Tripura Olympic Association buai chinfelnaah MOA president a tel

Tripura Olympic Association buai
chinfelnaah MOA president a tel
Tripura state-a Olympics association pahnih awm vanga kum 15 chhung sports discipline hrang hrangin harsatna an tawh chingfeltu zinga Indian Olympic Association-in a ruat zingah Mizoram Olympic Association president Robert Romawia Royte telin, he buaina hi chinfel a ni a, association pakhata thuikhawm an ni.
Thudawn danin, Tripura-ah hian Olympics association pahnih awmin kum 15 an inthlang tawh lo a, India rama sports inelna lian National Games-ah pawh an tel theih lohna a rei tawh hle.
Tripura sawrkar leh infiammite bakah mipuiin dan ang taka din Olympics Association ding ve se an duh a. Indian Olympic Association (IOC) president Dr PT Usha chuan a ngaihtuahtu tur – IOA Adhoc Committee on Tripura a din. Chairman-ah Meghalaya Olympic Association working president John F Kharsingh niin, member pahnih – Mizoram Olympic Association president Robert Romawia Royte leh Arunachal Pradesh Olympic Association secretary general Bamang Tago an ni.
Adhoc Committee hian Tripura vawi thum tlawhin, a tul angin an chamchilh a. Chief minister, Sports minister, Sports secretary leh director bakah state level sports association zawng zawng kawmin, sports veterans leh Arjuna Awardees an kawm bawk.
IOA-a report an thehluh hnuah IOA hian Adhoc Committee term hi a pawtsei a; Tripura Olympic Association (TOA) dan thar siamin, hruaitu thlan zawh thlenga thawk turin a ti. TOA constitution leh tul dang an siam zulzuiin, TOA hruaitu thlan pawh neih a ni a, Tripura Olympic Association a ding thar ta a ni.
Hei hi IOA pawm awmchhun niin, Tripura-ah Olympic association dang awm a thiang tawh loa, discipline state level association zawng zawng pawh TOA hnuaiah hian an awm vek tawh a ni.
IOA Adhoc Committee chairman John F Kharsingh chuan TOA hruaitu tharte hi May 23 khan rinawmna thu tiamtirin Tripura Sports minister Tinku Roy pawhin IOA president Dr PT Usha hmalakna leh IOA Adhoc Committee on Tripura hnathawh a fak a, TOA thar a ding ta chu lawmawm a tih thu a sawi.
IOA Adhoc Committee member Robert Romawia Royte pawhin thu sawiin, rei tak a buai hnua Tripura Olympic Association a ding thar leh ta chu lawmawm a tih thu a sawi a. Hruaitu thar, Olympian Dipa Karmakar kaihhruai chu a lawmpui tih a sawi. Sports discipline association ho leh infiammite pawh phur taka Olympic movement-ah tan la thar turin a fuih a, Mizoram Olympic Association aiawhin lawmpuina a hlan a ni.
Agartala-a he hun hman hnu hian Agartala Mizo Welfare Association hruaituten Hachhek bialtu MLA Robert Romawia Royte hi kawmin an harsatnate an thlen a. Hnam thuam engemawzat a pek tur thu sawiin, sumfaiin tanpuina a hlan bawk.