Lengpui Airport-a trolley indaihlohna an lo auchhuahpui tawh chu sawrkarin a ngaihsak lo hle tih ZPM Thalai chuan sawiin, mipui ngaihpawimawh lohna lian takah an ngai tih an sawi.
-- Advertisement --
ZPM Thalai Hqrs. hruaitute hian 2023 February 4-a Lengpui Airport an tlawh lehnaah thlawhnaa zinte harsatna, trolley indaihloh leh thildang chungchang an lo auchhuahpui tawh chuan ngaihsak a hlawh tawk lo hle tiin, hei hi mipui ngaihpawimawh lohna lian takah an ngai tih an sawi.
GAD atangin Airport Terminal chhungah thlalak phal loh a ni tih tun tuma Lengpui Airport hian an hre thar bawk tih ZPM Thalai hian sawiin, ‘MNF sawrkar hian Lengpui Airport an sak dan hi an zahpui ta em ni,’ a ti.
Luggage trolley 22 chiah hman tur a awmte, in sak bungrua thiarnaa hman a nih avanga trolley tam tak chhia a awm chu pawi an tih thu te, sum tam tak senralna Airport sak hna muang lutuk leh a hna chhe lutuk chu pawi an tih thu te sawiin, ‘G-20 summit kan thlen turah Airport hnathawh muang leh chhia avang hian MNF sawrkar hian Mizoram mipui min mualpho mai ang tih kan hlau hle,’ a ti.