Truck-in temple-a inkhawm a sutah mi 15 thi

Madhya Pradesh-a Gwalior-ah Shitala Mata Temple-a inkhawm an awm laiin truck-in a luhna gate pui ber a sut avangin mi 15 an thi a, mi dang 27-in hliam an tuar tih police-in an sawi.
Inrinni zan, Pathianni zing lama thil thlengah hian truck hian a sut nat em avangin gate bang thenkhat pawh a chim a, mi eng emaw zat a chim hian a delh niin an sawi.
Gwalior Superintendent of Police (SP) Dharamveer Yadav-a chuan truck hi a khawl lamah fel lohna a awm a, a khalhtu hian a thunun thei lo niin a sawi a. A neitu, Mohit Singh-a leh a khalhtu, Dilbag Singh-a te an man nghal niin a sawi.
Inkhawm lai panga chu an na deuh va, Gwalior-a damdawi in hrang hrangah hruai an ni a, mi dangte erawh hliam na lutuk nei an awm lo va. Thite hi Gwalior leh a chhehvel district-a mite vek an ni.
“Saptami a lo thleng a, Gwalior leh a chhehvel district atangin temple-ah hian Inrinni zan tlai tawh tak thlengin mi tam tak an pung khawm a. Mi an tam em avangin lirthei lian chi pawh luh phal loh a ni,” tiin Yadav-a chuan a sawi.
“Zing dar 1.30 velah thlai phur truck hi Chinor lam atanga lo tlanin police-in lo dan an tum a; mahse, a khalhtu hian thunun thei lovin awihah a tlan zel a, kawng sira dawr lo inpho leh inkhawmte pawh a su a ni,” a ti a. Police-in a danna tur an siam pawh su tlangin gate hi a su ta tih a sawi.
Police chuan stall panga paruk vel a su chhia a, mihring 41 vel a su bawk niin an sawi a. Rescue team leh police thleng nghalin gate bang chimin a delhte pawh an la chhuak tih a sawi.
Prime minister pisa chuan thil thleng pawi a tih thu X-ah a tar lang a, thi chhungte chu Rs. nuai theuh pek an nih tur thu leh hliam tuarte pawh Rs. 50,000 pek an nih tur thu a tar lang.
District Collector Ruchika Chauhan-a chuan hliam tuarte hi Red Cross suma enkawl an nih thu leh damdawi an mamawh ang zawng zawng pek an nih thu a sawi.