Truck khalhtu/neitu zingah kuhva phur duh lo an tam

Truck leh tipper neitu leh a khalhtu pawlte chuan an zingah dan loa kuhva tawlh duh lo an tam a, hlawk thut duhna hian an ‘moral’ a tichhe hle tih an sawi.
Tunlaia dan loa ramdang kuhva rah phurh leh a kaihhnawihah Inrinni khan Hachhek Bial Kuhva Chingtu Pawl (HBKCP), Mizoram Tipper Drivers & Owners Association (MTDOA) leh Mizoram Truck Driver Association (MTDA) hruaitute an inkawm a. HBKCP hruaitute sawi danin, pawl pahnih hruaitute hian dan loa kuhva ro tawlh vanga Mizo driver-ten harsatna an lo thawn thin tawh avangin titawpa tura hma lak ni thei se an duh tih an sawi a. Sawrkar lamah pawh an lo bei ve tawh thin, tiin, lirthei kangtel thin chungchangah awmze nei zawka ngaihtuah turin HBKCP an ngen.
MTDOA leh MTDA hruaitute chuan Customs lama hremna an tawrh nasat thin dan leh an lirthei insurance tih dan azira sum an chawi zat a insan hleih thin dante sawiin, dan loa kuhva lut reng reng tihtawp hmak chu an duh ber a, HBKCP hmalakna chu an thlawp tih an sawi.
Thutkhawmah hian MTDOA leh MTDA chuan an zingah kuhva ro phurh duh miah lo an tam a, tuna la phur reng chu mi 2/1 bak an ni lo, tiin, ‘Dan phal loh kuhva rah phurh tur a awm hian lirthei neitu leh khalhtu moral a tichhia a, taima taka hna thawka thawhrah seng tur kan nih lai a, hun reilotea sum hmuh thut theihna hian min tichhe zo a ni,’ an ti.
Kuhva tawlh hian Mizoram a paltlang chuan a hlawkna tak tak teltu chu a ram leilung fate niloin, hnamdang an ni leh thin tih sawiin, hei hi tawp hmak thei se an duh ber tih an sawi a. Kuhva tawlh chungchanga mawhphurtu lian ber chu police an ni lo thei lo, tiin, police-ten ram leilung fate hamthatna ngaihtuahin, diklo taka thil ti te ven kawngah dan dik takin hna thawk se, hetiang harsatna hi a awm an ring lo tih an sawi a ni.
HBKCP chuan kuhva phur lirthei kang awm leh thin chu, warning an pek tawh ngeite pawhin an la rawn kalpui leh thin avangin, mipui lamin inrunluihna leh inngaihnepna ang hiala an ngai tawh a, mipui thinurna a nasa tawh tih an sawi.