Dan loa sumdawng 35 hmuchhuak

Sub Hqrs. YMA Lunglei chuan Inrinni khan Lungleia hnamdang dan loa sumdawng leh Mizo hming hawnga sumdawng an awm leh awm loh an enfiah a, hetiang chi hi dawr 35 an hmuchhuak.
Sub Hqrs. YMA hi group thumah insiamin, hmar lamah Zotlang leh chhimlamah Lunglawn thleng an kal a. Dan loa hnamdang sumdawng leh Mizo hming hawnga hnamdang sumdawng 35 hmuchhuakin, eichawp zawrhna dawr, thingpui dawr, bel zawrhna, puan thuina dawr, electric bungraw zawrhna leh automobile workshop te a ni.
Dan loa sumdawng leh Mizo hming hawha sumdawnna kalpui chungchangah hian hma lak chhunzawm zel an tum tih Sub Hqrs. YMA Lunglei hruaitute chuan an sawi a. An hnuaia Legal Committee-in an zirchian hnu ah ruahmanna siamin, a tul dan angin hma an la dawn tih an sawi a ni.
Hei hi YMA kumpuan ‘Ram leh Hnam Humhalh’ bawhzuina kalzel a ni tih an sawi a. Mizo mipui leh Lunglei mipui thanharh phah se an duh tih an sawi. Hetianga inzawmna sumdawnnaah hian a hlawkna tam zawk hi hnamdang (Vai) kutah a lut tih hre turin an ngen tih an sawi bawk.