Trump-a’n Modi nena inbia anga a sawi India-in dawt tihsak
Trump-a’n Modi nena inbia anga a sawi India-in dawt tihsak
US President Donald Trump-a’n Prime Minister Narendra Modi-a nen phone-a inbia leh Indian hruait u hian Russia atanga tuialhthei a lei tihtlem a tum nia intiam anga a sawi chu New Delhi chuan a pha a, inbiakna engmah a awm lo tih a sawi.
“US atanga energy chungchang sawi awm hi a hmaa kan lo sawi tawh ang bak kha sawi tur kan nei lo va. Telephone-a inbiak chungchang sawi pawh keiin ka sawi theih chin chu, prime minister leh President Trump hian inbiakna an nei lo,” tiin Indian external affairs ministry thupuangtu, Randhir Jaiswal-a’n Ningani khan a sawi.
Trump-a hian Nilaini khan White House-ah Modi nen inbiain ram pahnih inkar thil an sawi tih a sawi a. Prime minister hi ‘pa ropui’ tia sawiin India pawh ‘ram ropui tak’ tiin a sawi a. Tun hnaiah an inbia a, Malaysia-a ASEAN Summit-ah pawh an inbe leh mai thei tih a sawi bawk.
Trump-a hian Modi-a’n Russia atanga tuialhthei lei loh a tiam niin a sawi bawk a. “A thleng nghal thei kher lo vang a; mahse, a lei lo thuai dawn a ni,” a ti a ni.
India-in Russian tuialhthei a lei loh chuan Russia-Ukraine indona chin fel pawh a awlsam sawt dawn niin Trump-a hian a sawi a. “Hun rei lo te chhung atan Russia atanga tuialhthei a lei a titawp ang a, indo a tawp hnuah a kir leh mai dawn a ni,” a ti.
US president-in hetianga a sawi chungchangah hian Indian sorkar chuan ram dang atanga energy lak luhah kal dan nghet tak a nei a, New Delhi-in thutlukna chu India-a a hmangtute thatna tur leh ram pum energy security thlira siam a ni a, ram dang politic thil avanga thil tih mai mai a ni lo tih a sawi.
“India hi tuialhthei leh boruakalhthei lei tam ram a ni a. Kan ngaih pawimawh ber chu a hmangtu Indian-te thatna leh hlawkpui tur ang a ni a. Thil kan lak luh dan hi chumi ang zela kalpui kan ni,” tiin MEA chuan ziakin thu a chhuah.
Washington nena energy-a indawr chungchang zawhna chu MEA chuan India hian US thlenga huang zauh a tum reng tih a sawi a. “US chungchang bikah hian kum tam tak chu kan lak luhna huang zauh tum a ni a, kum 10 liam ta chhung khan hma pawh kan sawn hret hret a. Tuna sorkar mek hian India nena thawhho pawh an duh a, indawrna a kal mek zel,” tiin a sawi.