Trump beitu ten thlawp ta vek

Republican party convention neihnaah kum 2024 Republican nomination atana Donald Trump-an a hneh tawh te chuan pakhat te tein Trump fakna an sawi.
Trump chuan a elpui Thin te Nikki Haley, Ron DeSantis leh Vivek Ramaswamy tena a candidacy an pawmzia an sawi chu nui var var chungin a lo thlir a ni.
“Chiang taka sawiin bul ka Tan duh chu: Donald Trump hi ka thlawp bur a ni” tiin Haley, UN Ambassador hlui Trump nena inbei ber tawh chuan a sawi a.
Milwaukee event ah ‘unity’ duhna avangin Trump chuan thusawi tura a ngen thu a sawi zui bawk a. “Kan ram tan liau liau Donald Trump kan thlawp a ngai” tiin Haley chuan a sawi.
Haley hian May thla daih tawh khan Trump a vote tur thu a lo puang tawh a. Mahse, tuna Milwaukee a thusawi chu chiang taka Republican nominee a thlawp turzia a sawi lan chianna bera ngaih a ni.
Haley chu Republican Thenkhatte chuan an lawm em em lo thung a. Na taka Trump hneh ngei tuma campaign a kalpui vak avangin ngaihdam har an ti thung a, Trump chu president ni turin mental stamina a nei em tih te thlenga lo bei tawh a ni.
Thusawi tura podium a pan lai pawhin mi Thenkhatte chuan lo aukhumin an boo bawk a. “A phu a ni” tiin Gregory Swtizer, Texas a conservative activist chuan a sawi a.
“Presidential nomination race-ah chak dawn lo tih inhre chungin a tawpsan duh mai lo rei lutuk a. A tawp thlengin Trump kaihhnawih a sawi te chu thil duhawm lo lam vek a ni” tiin Matt Bumela, Washington state delegate chuan a sawi bawk.
Haley chuan amah thlawptute chu Trump vote tura ngenin, “Trump vote turin Trump nena 100% a ngaihdan inang inneih a ngai kher lo, keimah ang hian vote mai rawh u” tiin ngenna a siam a ni.
“Zanin hi kan inlungrual zan a ni” tiin New Hampshire state Senator William Gannon, Haley delegate ni tawh chuan a sawi a. Trump chuan thusawi tura Haley a sawm chu thutlukna diktak a siam a ni tiin a sawi.
Primary a pathumna Florida Governor Ron DeSantis chu mipui tena an lawm ber a ni thung a. A thusawinaah conservative social issues hrang hrangte sawiin lawm a hlawh hle.
Mipuite chu Trump thlawp bur tura ngenin, “Kan tihnual thei lo, America kan tihnual thei lo” tiin DeSantis chuan a sawi.
Chu mai bakah Biden kum chungchang chu sawiin, “Commander-in-Chief ni khata darkar 24 leh kar khata ni sarih a hmahruai thei kan mamawh a ni,” tiin a sawi bawk.
Daniel Willis, kum 25 leka upa Delaware Young Republicans chair chuan DeSantis leh Haley te chuan Trump supporter te nena an inkara khi awmah lei an dawhkai fela a ngaih thu a sawi bawk.
Republican convention neihnaah hian campaign point hrang hrang te ramri a migrants lut te, crime leh Biden hneh a nih theih nana hmalakna tur hrang hrangte sawiho a ni a.
Texas-a US senator Ted Cruz chuan United States-in run a tawk tia sawiin Dr Ben Carson pawhin Democrats te chu Constitution pawtthlerah a puh bawk.
Delegates te chuan party chhunga ngaihdan inang lo avanga inThenhranna awm te chu dah Thain President Biden hneh a nih theih nan tha thawh ni se an ti a. “A tawpah chuan, Republicans vek kan ni” tiin Georgia delegate Pam Lightsey chuan a sawi a. November thlaa US presidential election ah lungruala chet lak an tum a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More