Tu nge Mikel Arteta

Pian leh murna:
Mikel Arteta Amatriain tih hming puin kum 1982, March ni 26 -ah San Sebastian, Spain-ah a lo piang a ni.
Natna leh bawrhsawmna:
A tet lai hian a hrisel lo hle a; kum hnih mi lek a nihin natna vang tak mai – lungin thisen thianghlim a pek theih loh natna – a vei a. Chu a natna chu Spain-ah pawh Doctor tlemte chauhin an hriat a ni. Tichuan chawpchilh takin a lung chu an zai a.
A zaitu Doctor te pawhin Sports lam thil reng rengah chuan a inhnamhnawih theih an ring lo a. Mahse amah hian infiamna lam a ngainain Football a atchilh bur mai si a. A nu leh pa te pawh chuan an fapa tuina chu an dal duh bik lo a; an fapa-in football a khel zel mai chu – engtikah tak lungphu chawlin emaw lung lam fel lohna vangin emaw khelhmual chhungah tlu ang – ti a hlauthawng taka an thlir ruk thin chu Pathian zarah thleng loin football a chawlhsan ta hial a nih hi.
Football zinkawng:
Kum 1991 -ah kum 8 a upa a nih laiin an veng football club Antiguoko, San Sebastian -ah a thian tha em em mai Xabi Alonso nen kartawp a piangin an khel dun thin a. An pahnih hian Real Sociedad FC ah khelh dun chu an ‘dream’ thin a ni.
Barcelona B team lamah te, PSG ah te, Rangers adt lamahte hun a hmang a; a bak chu kan hriat vek tawh kha. Real Sociedad atangin Everton, chuta tang chuan Arsenal lamah a football huntawp hmangin Manchester City FC Assistant Coach niin tunah hian Arsenal FC Head Coach a lo nita a ni.
A nupui fanaute:
MA-a hi a mit a dik zek a! Spanish TV Presenter, Model leh film chan thiam ni bawk; chumai ni loin Spain Miss ningat tawh bawk Lorena Berna chu kum 8 zet a ngaihzawn hnuah ni 17, July 2010 khan nupuiah a nei a. Pathianin fanau lamah malsawmin fa pathum – Gabriel, Daneil leh Oliver te an nei tawh a. An hming atang khian mipa vek niturah ka ngai mai!
A hobby leh thildang:
MA-a hian a hunawlah chuan rimawi a ngaithla nasa a; tennis khelh te hi nuam a tiin a thiante leh a chhungkua te nen a hun hman hi nuam a ti hle bawk. Sakhuana lamah hian eng sakhaw zuitu nge a nih a hriat loh a; a tarlang ngai lem lo. Meizial a zu lo a; zu pawh a in ngai lo. A tet laia an football sikul zirtirtu thusawi awihin a taksa-ah hian ‘tattoo’ a nei ngai miah lo a. Tun hnuah hian a kut veilam zung û-ah hian China tawngin a nupui Lorena hming bul ‘L’ a ziak ve ta a nih hi.
|awng chi hrang hrang a thiam a; Spanish, Basque, Catalan leh English-in a tawng thei a. Tin, French, Italian leh Portuguese te hi tlem te te chu a hmang ve thei bawk.
Tunah hian Arsenal Football Club chu 2022-2023 English Premier League – ah champion pui mai thei turin a dinhmun a tha hle. Lo dam zel rawh se.