Tualchhunga buai Barca Europe-ah buai lo!

Tualchhunga buai Barca Europe-ah buai lo!
Spanish La Liga hmahruaitu ni chungin karliamta tawp league match-ah an tlawm a, an hnuai chiaha an mawng phe hmu pha tawh Real Madrid lakah point khat chauhin an sang tawh a, chuti ang boruak rit tak hnuaiah Nilaini zan khan Barcelona chuan Uefa Champions League an khel a, Slavia Prague muala 4-2 hnehna nen league stage paltlanga last 16 lut turin kawng dik an zawh zui zel.
Prague khawpuia Fortuna Arena chhung vawt vin tuk, temperature -6C zeta hniamah Catalan-ho an talbuai hmasa a, tan atanga minute 10-na lekah goal chhuahin, home team hmahruaina goal kha Tomas Holes thawhrah atanga Vasil Kusej tihluh a ni.
Barcelona beilet tana Fermin Lopez-a goal hnih tihluh hmangin Barca-in 2-1-in hma an hruailet a, mahse, chawlhlawk hma lawk minute 44-a striker Robert Lewandowski own goal avangin team pahnih hi half time-ah 2-2-in an intluk phawt.
Second half minute 63-ah Dani Olmo chuan Prague goalkeeper Jindrich Stanek dan zawh loh goal thumna thawhin, minute sarih a kal leh tihah Poland international Lewandowski chuan a chetchhiatna khuh turin mikhual goal lina a thawh ve leh a; competition kal laia round sang zawk luh beiseina nei chhunzawm tura chak mamawh ngawih ngawih Slavia Prague-in an kawtkaiah point an thawkchhuak zo lo.
An kawtkai result-in eng hlawkna mah a thlen zawh tak loh avangin match sariha point thum bak hlawhchhuak zo lo Slavia Prague chu khelh khat la nei chungin an tla fel ta a ni.
Barcelona hian hremna avanga khelmual lut thei lo Lamine Yamal tel loin bul tan fuh lo mah se mualneitu team lakah chungnung takin second half an thunun a; darkar khat an khel tling hlawt tiha Barca boss Hansi Flick-a’n England forward Marcus Rashford leh Olmo a luhtir khan mikhual game a siamtha a tih theih ang.
|um nga zet European champion ni tawh Barcelona hian match khat hmabak la nei chunga point 13 humin table-ah pakuana an luah mek a, round sang zawk luhna rahka top eight luah pha tur leh February thlaa two-legged play-off pumpelha round of 16 lut turin karleh Nilaini zana an mikhual tur Copenhagen an hneh leh phawt a la ngai dawn a, an chak zawh loh chuan season liamtaa semi-final an thlen boruak kha an hip pha dawn em tih a chiang lo ruai thei ang!
Barcelona hian tunthla tir lam khan Spanish Super Cup lain, La Liga lamah hma an la hruai der der a, Copa del Rey quarter-final an lut fel tawh bawk.