Tualchhunga SDG tih hlawhtlinna atana pawimawhte sawikhawm

SDG Coordination Centre, Planning & Programme Implementation department bultumin ‘Workshop on Localization of Sustainable Development Goals (SDGs) in Mizoram’ buatsaih a ni a. Ministry of Doner statistical adviser S Suresh Kumar, Ministry of Statistics and Programme Implementation joint director Ashwani Kanujia, UNDP regional head (North East) John Borgoyary leh UNDP hotu dangte an rawn hmanpui.
Mizoram Planning & Programme Implementation secretary Lalmalsawma Pachuau chuan kan thiltih hian mipui a thleng pha em tih leh an nunah eng ang takin nge nghawng a neih tih kan chhut a pawimawh tih a sawi a. Sustainable Development Goals (SDG) tihlawhtling turin SDG motto “leave no one behind” chu kan hmatheh a, mitin mai huapzoa hma kan lak a ngai a. Hemi kawngah hian sawrkar, corporation-te leh mipui inkarah thawhhona tha a awm a pawimawh hle tih a sawi a ni.
UNDP regional head John Borgoyary chuan private company thenkhat an CSR-te SDG hlawhtlinna’na hmang duh an awm nual a, heng ho hi kan pawhluh thiam a tul, tiin, chumi atana pawimawh CSR matchmaking portal chungchang a sawifiah.
DONER statistic adviser Suresh Kumar chuan environment livelihood security kan neih theihna’n thil pali – village level sustainable livelihood security, sustainable social security, ei leh bara an intodelh theihna’n sustainable food security leh naupang thanlenna atana an mamawh chaw puar khawp hmuloa an awm loh nan nutritional security ngaihpawimawh a ngai tih a sawi a ni.
Workshop-ah hian Mizoramin SDG monitoring framework a neih tawh hrang hrang zirchian niin, SDG kaihhnawih line department-te leh urban, local leh village level aiawh kalte nen sawiho a. Private company-ten mipui hamthatna atan project-te an fund theihna tur hmanrua, CSR matchmaking portal kalphung chu UNDP hotuten an sawifiah bawk.
Planning and Programme Implementation SDGCC senior consultant Rosangzuali Chawngthu report danin, NITI Ayog-in tehfung hrang hrang hmanga state tinte a tehnaah Mizoram chu SDG performance-ah 12-na niin, ‘Most Improved State’ a ni. North East-ah 2-na a mek bawk. Sustainable development chungchang sawihoin zawhna chhan a ni.