Tualthattu court-in a hrem

A vahnu thattu Khawzawl nu chu court-in kum 10 chhung lung in tang tur leh Rs. 5000 chawi turin a hrem.
2022 February 19 khan Chingsianzovi (37), Khawzawl Zuchhip Veng chuan loa an riahnaah a vahnu Catherine T Biaksiami (14) chu a hma zanin misualin tibuaiin, a vahnu hi mi pahnihin an hruaibo a, misualte hi amah hian beiletin an zinga pakhat chu man betin a phuar hlawm a, a thi zui a, thlamah hian a kalsan niin Khawzawl Police Station-ah a report a. Police-ten an enfiahnaah Catherine T Biaksiami zawk hi thia hmuh a ni.
He thil thlengah hian Chingsianzovi hi rinhlelh ber a nih avangin police-in thu zawhfiah turin an la a, police-te hmaah a zanah a zu rui sualin an inhnial hnu ah a tihlum niin a sawi.
Champhai District Addl & Sessions judge Sylvie Z. Ralte chuan he thubuai hi ngaihtuahin Chingsianzovi hi thiam loh a chantir a. Chutihrualin tum lawk vang reng ni lo leh zu ruih sual avanga a vahnu tihpalh thila tihlumah a ngaih avangin hremna na zawk pumpelh turin a chungah zangaihna a lantir a; a tirah police hnena thu dik lo a hriattir avang erawhin hrem tel a ni thung. A sum chawi tur hi a pe thei lo a nih chuan thla khat dang lung in a tan belh dawn a ni.