Tui dahkhawlna tur pe

Mamit bialtu MLA Er H Lalzirliana chuan a bial chhunga Suarhliap leh Damdiai khuaah ruahtui dahkhawlna nei tha lo te hnenah plastic tuizem a pe.
Suarhliapah hian khawtlang hruaitut – VC leh NGO-te a kawm a. Tui dahkhawlna nei tha lo chhungkaw 66 hnenah plastic tuizem a pe a; puan thuia eizawng mi pathum hnenah puanthui khawl a pek bakah pheikhawk chhe siam thiam mi pakhat hnenah pheikhawk chhe siamna bungrua a pe bawk.
Bialtu MLA hian Suarhliap khawtlang tan company CSR atangin damlo phurhna tur ambulance pek tuma hma a laksak mek thu a sawi a ni.
Jal Jeevan Mission scheme hnuaia tui pump khawl chu Er H Lalzirliana hian Damdiai khuaah a hawng a. Tui an harsatna sawrkarin hria in, a ngaipawimawh tih a sawi. Sawrkar laipuiin mipuiin tui thianghlim hnianghnar tak kan neih theihna turin state sawrkar kaltlangin hma a la a, Mamit bial khaw tam tak tui harsatna khuaah JJM scheme hnuaiah khaw engemawzatah hma lak mek a ni tih a sawi.
Damdiai-ah hian tui dahkhawlna nei thalo chhungkaw 65 hnenah MLA hian plastic tuizem a pe a ni.