TUI HI

By Zoremi Hmar Zote

Kum 1992 khan United Nations General Assembly chuan khawvelah tui thianghlim duh khawp a awm zel theih nan tui awm sate awmze nei taka hman a tulzia leh chumi kawnga mi zawng zawng lungrual taka kan thawhho theihna turin March ni 22 hi World Water Day atan a ruat a, kum 1993 atang khan khawvel pum huapin he World Water Day hi hman tan a lo ni ta a ni.
Kan ni tin nuna tui pawimawhna hi chu inhrilh leh kher kan ngai lovin ka ring. Mihring chauh ni lo, khawvela thil siam tinreng mai hian tui kan mamawh vek a, chaw lova ni tam dam thei pawh tui tel lo chuan rei a dam theih hauh loh. Tui hi kan ei leh in tinreng siamna a ni a, kan bàl tinreng tihfaina a ni bawk. Chutih laiin khawvel pumah mamawh khawp tui dawng thei lo, dawng pha lo mi maktaduai hnih bawr vel an awm a, kan ram, Zoramah ngei pawh tun hma aiin tuihnà kang chat kan nei ta nual mai. Tun hmaa lui mawi tak ni thin Chite lui pawh kawr tui satliah ang chauhin a luang tâwk tâwk chauh tawh a, bawlhhlawh tinreng luan luhna ni mai awma mawiin a tawp ta bawk. A chhan ber ni-a lang chu a rama chêng ten kan duat loh vang leh, tui hlutna kan ngaihtuah phâk loh vang te, thing leh mau humhalhna kawnga kan vuaichà tak vang a ni.
Kan ram hi kan vannei a, khaw thâl/ro lutuk rei tak tuar hman lovin ruah a sur zel a, hei hian tuia kan harsatna tur min sutkiansak leh thin. Mi ram te angin a kum a kum ruah han sur lo ve nâ se chu(h)…nuam kan sa lo viau ang! Tun laiah luidung nungchate humhalh kan uar thar a, khaw thenkhatah phei chuan sangha man phal loh hun te siamin, sanghate chaw pein dan khauh tak an kengkawh a (Ngopa khua) a man theih hun an siamah chauh sangha an man thin a ni. Luidung nungcha kan humhalh ang hian kan thing leh maute hi humhalh ve ila, kan mamawh ber tuihna siamtu an nih hi mi tin hriat theih tura puanzar fo ni bawk se la a va duhawm em!
Thingtlang mite eizawnna ber chu lo neih a ni. Lo kan vât a, kum tam tak chhunga thang lian kan thing leh mâute kan sât thlu duai duai a, kan ngaw neih that dur pui pui, thing kum tam lêng tawh kan han kit thlu a, kan han hâl hluah hluah thin mai hi chuan ngaihtuah a tithui ngawt mai. Hetianga kan tih zel chuan kan ramngaw leh nungchate an chereu ang a, kan mamawh ber tuihnain min kangchahsan mai dawn a ni. Dik tak chuan thla thum te a zawna ruah a sur loh chuan PHE lamin tui sem tur an nei mang lo nghal zel a nia maw…A chhan ber chu kan tui lakna ber Tlawng luia luang lut tur lui tê an kangchah nasat vang a ni. Han ngaihtuah ve mah teh u, kan Aizawl khawpuiah ngei pawh hman laia tuikhur awmna thin, tuna tui pût awm ta lo va hul ta phiang te tam tak a awm; a chhan ber chu thing leh mau kan vah chereu vang a ni leh bawk.
Nimin khan Mizoram EIACP hub, Mizoram Pollution Control Board leh Chite veng Branch YMA chhang-te tangkawp chuan World Water Day denchhenin Chite luia bawlhhlawh thenfaina hun an hmang a, tui aiin Bottle chhia a tam zawk! Bawlhhlawh tinreng mai Polythene chhia leh eng eng emaw a pe thla tuarh mai han hmuh chuan lungawi a har khawp mai. Ram dang atanga lo kal khualzin ten an hmu ang tih mawlh ka lo hlau; ‘khualzin mite hîp turin chuti khati’ kan ti tlawrh dup a, kan lui te lah heti vel hi a nia, khawi lam khualzin mah hi kan hîp dawn lo! Hetiang em ema lui tawp hi khawvel hmun dangah a tam lo khawp ang le. Zah nachang hria kan lo awm hlauh chuan Chite lui hi zahna tham, zahpuiawm dik tak a ni. Hetiang khawpa lui tawp hmuh tur a awm leh a tibawlhhlawhtu kan êk nei lo lèn váh vah laia khawi khua/veng emaw ten khaw fai/veng fai lawmman an lo la leh thin te pawh an lakah a inthlahrunawm zo vek! Khawpui mi inti ve si, tawp si kan tam hle tihna a nia, ka lo zak e a!
Eng nge kan tih tâk ang le? Nakin zela lo la awm tur kan tu leh fate tan hian chenna tlâk ram nuam, tui thianghlim an mamawh tawk awm theihna hmun kan hnutchhiah dawn em le! Tuna Zoram luah mektu nang leh kei hi kan pawimawh ta. Kan tui lâkna hnâr te an kang chah mai loh nan, kan lui tuite an lo thianghlim reng theihna turin mi tinin mawhphurhna kan nei vek a, chu chu thing leh mâu humhalh te, kan luite vawn thianghlim leh tui kan neih sa te renchem taka hman zir te, Environment tichhe zawnga eizawn loh te leh ram, khawtlang hruaitute thu awih/zawm hi a ni mai awm e.