Tui lianin Indian Silicon Valley tibuai nasa

Tui lianin Indian Silicon Valley tibuai nasa
Indian chhim lama Bengaluru khawpui, India-a Silicon Valley tia sawi mai thin hmun thenkhat chu Thawhlehni khan ruah nasa tak a sur hnuah tuiin a chim nasa hle.
Andaman Sea-a thlivir inmung avangin fur tak tak thlen hmain Thawhlehni khan ruahtui hmasa thleng thei turin khawpuiah hian inralrinna puan lawk a ni tih thuneituten an sawi.
Thawhtanniah khan ruah kaihhnawiha chhiatna thlengah mipa naupang kum 12 telin mi pathum an lo thi tawh.
Bengaluru hi khawvel huap technology company lian tak tak inkulhna niin hengte hian an hnuaia thawkte chu tuiin kawngpui a chim nasat avangin in lama hna thawk turin an ti hlawm.
Thawhtanni bikah khan khawpui hmun thenkhat chuan ruah mm 100 zet an dawng a, kum 2011 hnua a tam ber tum a ni.
Heng zat zet ruah a sur hi Bengaluru-ah chuan ‘thil thleng khât tak’ a nih thu regional weather department director, CS Patil chuan news agency-te hnenah a sawi.
Khawlaia tui tling bakah lirthei kal vel buaiin ni tin khawsak phung a tibuai hle a, ruah tam lutuk chuan thil a tichhe nual bawk.
Thawhtanni tukah khan khawpuia hmun lun lai, IT corridors an tiha software firm, i-Zed hmun hungna bang a chim a, an hnuaia thawk hmeichhia kum 35 mi a thi.
Video thehdarhahte chuan khawlaia kalten khup thlenga tui an dai lai te, kawtthlera lirtheite tuiin a dan te pawh hmuh tur a awm a. Chenna in thenkhatah chuan tui a lut nasa hle bawk.
Thuneitute chuan tui len theihna hmun 210 an chhinchhiah bik a, heng hmunah hian nileng zankhuain himna tura hna thawh a ni tih an sawi.
Karnataka Deputy Chief Minister DK Shivakumar chuan Thawhtanni khan Bengaluru-a chengte tan chiaina tur a awm lo tih a sawi a; mahse, social media-ah mi tam takin sorkar hotute chu in sakna leh kawng khuar nasa lutuk te, tui tlin theihna tam lutuk avangin an sawisel nasa hle.
Bengaluru awmna, Karnataka hi Congress party kaihhruai sorkar dinna a ni a. Eptu, BJP chuan khawpuiah hian cheng maktaduai tel hmang chungin ruah kaihhnawih thil hmachhawn danah hlawhchhamah sorkar chu an puh.
BJP hian chhawmdawl hna thawhna tur Rs. tluklehdingawn 10 pe chhuak nghal turin sorkar chu an phut bawk.
State sorkar erawh chuan hetiang hi hun rei tak atang tawha buaina a nih thu an sawi thung a. “Vawiina kan thil tawn hi thil thar a ni lo va, kum tam tak chhung sorkar leh thuneituten an lo hlamchhiah tawh zawk a ni,” tiin Shivakumar-a chuan a sawi.
Bengaluru-ah hian tun hnaiah tui lian a thleng kum tin a. Mi thiamte chuan khawpuia dil leh hmun hnawngah in sak a pung chak lutuk a, khawpui duan a that tawk loh vang niin an puh.