Tui pawimawh zia inhrilh thar

Khawvel puma tui pawimawhna inzirtirna ni – ‘World Water Day’ chu Public Health Engineering department leh Central YMA huaihawtin Thawhtanni khan Aizawlah hman a ni.
PHE chief engineer (Zone-I) Ngentluanga chuan kumin World Water Day thupui – “Water and Gender” a sawizau a. Hnianghnar taka tui a luanna hmunah chuan intluktlanna a awm thin, tiin, mipa leh hmeichhia intluktlanna thlentu pawimawh a nih dan a sawi.
Chief engineer (Zone-II) Lalropuia pawhin, Mizoram-in fur laiin ruahtui hnianghnar tak (2-2.5m) hmu thin mah ila, thalah erawh tui kang avangin kan buai leh fo thin tih a sawi a. Tui renchem nachang leh tui dahkhawl nachang hre thar leh theuh turin mipui a chah.
Central YMA president R Lalngheta chuan, Mizorama kan lui tui leh tuihna humhalh a pawimawh tih sawiin, “Ruihhlo do tluk zetin ngaipawimawh ila, tui hna ti bawrhbangtute chu tu pawh nise, do ngam ang u,” a ti.
World Water Day hmannaah hian lui tui leh tui hna humhalh tura thutiam chhamrual niin, tui hna humhalh kawnga inelna hrang hranga tithate hnenah lawmman sem a ni bawk.
United Nations General Assembly 1992 chuan March 22 hi World Water Day atan a puang a. Kum 1993 atang khan khawvel hmun hrang hrangah hman tan niin, Mizoramah chuan kum 2012 atang khan hman tan a ni. Kuminah Pathiannia a tlak avangin a tukah hman a ni.
He ni pual hian inelna hrang hrang buatsaih thin a ni a. UN hian kumtin thupui thlan bik a nei thin a, kumin thupui chu “Water and Gender” tih niin, auhla chu – Tui hnianghnarna hmunah intluktlanna a awm thin (Where Water Flows, Equality Flows) tih a ni.
March 8-22 chhung khan tui pawimawhna leh tuihna humhalh tura inzirtirna, Jal Mahotsav (Tui Kut) chu state level (Rajya Jal Utsav /Nadi Utsav) leh village level (Lok Jal Utsav) ah hman a lo ni tawh bawk.