Tui pump tluang, mahse a nu

Aizawl mipuite tan PHE department-in Tlawng tui an la a, sem turin tui hi tun hnaiah tluang pangngai takin an pump thei. Mahse tui hi a nu a, a nu chung pawha pump a ngai thin.
PHE department atanga thu dawn danin, tun hnai teah pump chi loh khawpin a nu lo a, mahse tui hi a nut thu-ah chuan a nu. Mamawhna a san em avangin a nut deuh chang pawhin an pump a, chuvang chuan a pump hna pawh a kal tluang tiin an sawi.
Tun hnaiah ni khatah darkar thum te an chawlh a ngaih chang a awm a, chu chu a nut em vang a ni. A hma anga rei deuh deuh chawlh a ngai rih lo.
Tui fim lam tehna NTU (Nephelometric Turbidity unit) 5 aia sang chu mipui hnenah an sem lo a, sem tlak a nih theih nan hian an pump hnuah an tifim thin. Nikum leh kuminah pump chi loh khawpin Tlawng tui hi a nu fo a, pump lui se khawlin a tuar a, chumi pawisa lovin pump pawh ni se Tlawng lui tui hi tihfim rual loh khawp a ni thin.
PHE department hotute chuan tun hnaiah a nut laiin NTU 900 te a ni thin an ti a, NTU 800 te, NTU 700 te a ni thin an ti bawk.
Khua a that chuan tun hnaiah NTU 250-400 te a ni tlangpui an ti a, lui tuiah chuan hetiang vel hi a fim a, mahse khua a chhiatin a nu nghal vak zel an ti.
Aizawl velah ruah a sur loh pawhin a hnar lamah a surin tui hi a nu thin tih an sawi a, a hnar lama a sur hian a nu hma tih an sawi bawk.
A nut deuh chang pawha tui an pump avang hian mamawh khawp pawh an pump thei a, mahse pump chi loh khawpin a nu ang tih a hlauhawm thu an sawi.