Tuihna humhalh leh ruahtui khawl lama sawrkar hmalak dan enfiah

Tui hna humhalh leh ruahtui khawl tura sawrkar laipui hmalakna Jal Shakti Abhiyan: Catch the Rain 2022-a central nodal officer, Ministry of Mines director Mustaq Ahmad leh Central Ground Water Board scientist ‘B’ Ashwin te chuan kar kalta chhung khan Lunglei district-a hmalakna an enfiah.
June 22-24 inkara enfiah chhung hian Lunglei district hmun hrang hranga tui hna humhalh kawnga hmalak dan, check dam sak, tuihna siamtu thing phun belh (afforestation) leh solar pumping hmalakna bakah Village Water & Sanitation Committee hmalakna an enfiah a. Pukpui, Serkawn, Zobawk, leh Buarpui ah te endik a ni.
An thil hmuh leh rawtna an neih te chu Inrinni khan district bawrhsap Ramdinliani hoin an sawikhawm a. Central nodal officer-te bakah a kaihhnawih department official-te an tel.
Central nodal officer-te hian tuihna humhalh leh ruahtui khawl kawnga hmalakna hrang hrang an hmuh chinah tha thawkhat an tih thu leh hmalakna uar leh chak zawka kalpui a tul tih an report a. Kan tui chhia leh thli paih dan tun aia uluk a tul thu leh in tinin soak pit neih a tul tih an hmuh thu an sawi. Heng kawnga kan fimkhur loh chuan kan hriselna pawh thui takin a nghawng thei tih an sawi a ni. Sawrkar department hrang hrang thawhhona tha an tih thu leh hun lo kal zel turah pawh department-te tangrual taka convergence-a hna kalpui tura an duh thu an sawi a ni.
Endiktute hian sawrkar laipuiah report an thehlut anga, kumin October-ah Lunglei hi an tlawh leh dawn a ni.