Assam Chief Minister Himanata Biaswa Sarma-a’n US president hlui Barack Obama chungchang a sawi chuan internatinal headlines a siam mai bakah ram chhunga Opposition party-te chuan an sawisel na hle a, a thente chuan Islamophobia tiin an sawi hial bawk.
Barack Obama chuan, “US President-in Prime Minister Modi a hmuh hunah chuan India-a Hindu majority rama Muslim minority te himna sawi lang ngei se. Prime Minister Modi ka hriat that em em nen hian titi dun ila chuan India rama minority te i humhim lo a nih chuan India chuan kehchhiat a tan ang tiin ka hrilh ang,” tiin a sawi a.
He mi chungchangah hian journalist pakhatin Himanta chu Obama thusawi avangin Assam Police tena man an tum dawn em tia a ngaihdan a zawhna chu Sarma chuan “India ramah Hussain Obama tam tak an awm,” tiin a chhang a. “India ramah Hussain Obama tam tak an awm a. Washington-a kal hmain chung mite chu kan ngaihtuah phawt ang a, Assam Police te chuan a tul dan ang azir zelin hma an la ang,” tiin a chhang a ni.
All India Congress Committee (AICC) in-charge Jitender Singh chuan Assam CM chuan White House pawha press conference nei hial Prime Minister Narendra Modi-an India ramah caste, creed or rinna avangin tumah thlei bikin an awm lo a tih chu a ‘namnul’ tiin a sawi a ni.
“Assam Chief Minister hi Constitution of India hmanga chhechham niin minority te vauin Modi thian tha Barack meuh pawh zuah lovin Hussain Obama a ti a nia. Prime Minster berin White House ngeia a thusawi te chu a namnul hneh hle a ni,” tiin Singh chuan a sawi.
Congress leader tho Jairam Ramesh pawhin, “PM Modi hian a ti takzetin i ring em? CM of Assam hi fringe element a ni lo va, PM thuihruai takzet zinga mi a ni tlat,” tiin a sawi thung.
CPI(M) te pawhin sawiselin, “Himanata Biswa Sarma, i Islamophobia kalpui hmangin leh zawhna zawh laka dawhtheihlohna i neih hmangin India timualphotu i ni,” an ti bawk a.
Congress social media team hotu Supriya Shrinate pawhin, “My friend Barack chu tunah chuan Hussain Obama a ni ta,” tiin a sawi bawk a.
“A nihna takah chuan Himanta chuan White House-a PM Modi an zawh a chhang zawk a ni. “President Obama Muslim a nihna leh Indian Muslim te mei nei taka an ti zel hi chu zirlai zirtir an ngai a ni. PM, MEA leh Govt of India dinna eng nge?” tiin Shrinate chuan a sawi bawk.
Nationalist Congress Party spokesperson Clyde Crasto chuan, “Sarma hian US-a PM thusawi te a ngaithla miah lo a ni thei a, a nih loh pawhin PM Modi thusawi te engahmah a ngai lo pawh a ni thei,” tiin a sawi a. Khawvelin White House-a Modi thusawi an awih dawh a nih chuan Assam CM hian ngaihdam a dil a ngai tiin a sawi bawk.
-- Advertisement --
Akhil Gogoi an ngaihdam dil
Activists atanga MLA ni ta Akhil Gogoi chuan Assam Chief Minister Himanta Biswa Sarma ‘racist’ thusawi avangin US President hlui Barack Obama hnenah ngaihdam a dil a.
A ngaihdam dilna video message hi June 24 khan siamin Prime Minister Narendra Modi pawh a hmer tel bawk.
“Namaskar Modiji, Akhil Gogoi, Assam atanga mi satliah mai ka ni a. Kan chief minister Dr Himanta Biswa Sarma-a’n Barack Obama laka communal hawi leh racist hawia thusawi a nei hi ka zak hle a ni,” tiin Gogoi, chief of Raijor Dal chuan a sawi.
“Hetianga communal leh thusawi tha lo zet sawi fo Himanta Biswa Sarma aiawhin ngaihdam ka dil a. Assam atanga a unaupa leh MLA pui nihna angin a aiawhin ngaihdam ka dil a. A thusawi awmze nei loh hi lo ngaidam teh u,” tiin a sawi bawk.
“Hussain” tih chu Obama middle name a ni a, mahse Sarma-an a sawi hmang ang hi chuan Muslim-te beihna leh sawina anga ngaih a ni.