Tuikuk voter 11997 paih tawh

Mizorama hun rei tak an awm hnua Tripura-a chhuka inbengbel Tuikuk zingah Mizoram electoral roll-a hming chuang voter 11997 paih an ni tawh tih MNF Thalai chuan sawiin, hei hi chief minister leh NGO Coordination Committee thawhrimna leh tanrualna rah, Mizoram tan mellung pawimawh leh hriatreng tur a ni tih an sawi.
MNF Thalai Hqrs. vice president Zodinpuia sawi danin, 1997 October 21-a Mizo tlangval pakhat, misual kuttuara a boral avangin Mizorama Tuikuk khawsate chu Tripura-ah tamtak hawthla in, Tripura state chhunga relief camp parukah an inbengbel a, Tripur-a chhuk Tuikukte avangin Mizoram sawrkar bakah tlawmngai pawl hrang hrang leh Mizo mipuiin harsatna tamtak kan tawhphah tawh tih a sawi.
2020 January 16 ah chief minister Pu Zoramthanga hmalakna leh tlawmngai pawl hrang hrang tanrualna avangin Tripura-a khawsa Tuikukte chu Union Home minister Amit Shah kaihhruaina hnuaiah mi 30000 chuang Tripura-a awm nghet turin New Delhi-ah inremna thuthlung an ziahpui tih a sawi a ni.
“Kum 24 chhung Mizoramin harsatna kan tawh chinfel a nih theihna tura Pu Zoramthanga leh a kaihhruai MNF sawrkar hmalakna, Mizoram himna tura beidawng loa theihtawp chhuah rengtu NGO Coordination Committee hmalakna hi MNF Thalai chuan kan chhuang takzet a ni,” Zodinpuia hian a ti.