Tuilian leh leimin a thlen thulha lo hmachhawn dan zirho dawn

Tuilian leh leimin a thlen thulha
lo hmachhawn dan zirho dawn
Sawrkar laipui Ministry of Home Affairs, National Disaster Management Authority (NDMA) leh State Disaster Management Authority Mizoram tangdun chuan tuilian leh leimin a thlen thulha hmachhawn dan leh chet lak dan tur mipui an zirtir a. November 14 hian a tak ang thei turin entir a ni ang.
Hemi atan hian district tinah inpuahchahin a kaihhnawih sawrkar department leh khawtlang hruaitute an thukhawm chho reng tawh. Thawhlehni khan state level thutkhawm chu District Disaster Management Authority (DDMA) Aizawl kaihhruaiin Incident Response Team (IRT), local council leh NGO nen neih leh a ni a. District danga DDMA leh IRT ten biak hmuh theihna hmangin an zawm.
Disaster Management & Rehabilitation secretary K Lalrinzuali chuan Table Top Exercise hman a nih chhan, November 14-a Mizoram pum huapa state level mock exercise neih tur a tul chhan a sawi a. NDMA hotuten thu an sawi bawk
Table Top Exercise pual hian tuilian leh leimin chungchangah hriat tur inhrilh zau a ni a. Lunglei Fire Station-in kum hmasa lama kangmei chhuak liantham tak, hlawhtling taka an thelh mih dan pawh thlirho a ni.
State Level Mock Excercise hi district tinah November 14 hian huaihawt a ni dawn a. Tuilian, leimin leh kangmei chhuak avanga chhiatna thleng thulha chet lak dan tur a takin kalpui a ni dawn. Aizawlah chuan mock exercise atan hian tuilian, leimin leh kangmei chhuak kaihhnawih chhiatrupna thlenna tur hi hmun thum – Sairang, Seventh Day Hospital leh Vaivakawn ruahman a ni a. Siren tih rik a ni dawn a, electric current pawh off thut niin kawng block leh thil dang thleng theite a taka entir a ni ang.