Miami tana Messi inlan hun tur

Ligue 1 giants Paris Saint Ger-manin chhuahsana North American football luhchilh tur Lionel Messi chuan thla thar hian a club thar Inter Miami tan khelmual a lut tan dawn tih nemngheh a ni.
Thawhlehni khan Miami managing owner Jorge Mas chuan Miami Herald newspaper hnenah he thu hi hrilhin, July ni 21 khian Major League Soccer club Inter Miami chuan Leagues Cup khuhhawnna inkhelah Mexico rama an top flight league Liga MX an tiha an club hraw pakhat Cruz Azul an mikhual dawn a, hei hi United States leilunga Miami thuam inbel chunga Argentine inlan vawikhatna tur a ni.
Leagues Cup an tih hi MLS leh Liga MX club-te inelna kumtina khelh thin a ni.
Messi leh Miami hian a thuin inremna siam tawh mah se ziaka tihfel an la hmabak a, US-a inkhel turin Argentine great hian visa a buaipui mek bawk.
Miami Herald-in a thua pawl pahnih inrem dan a tarlan ang chuan kum 35 mi hian kum hnih leh a chanve daih contract a ziak phawt ang a, hetih chhunga a hlawh tur hi US dollar maktaduai 50 atanga 60 inkar thuartham niin, pawl pahnihin an duh dun chuan contract hi kum 2026 thleng pawhsei theih a ni ang tiin.
Inter Miami hotu lawk Mas chuan Messi an kawl tak avangin an team khelh dan kalphung leh formation an thlakdanglam chiam dawn lo tih sawiin, Ballon d’Or chawimawina vawi sarih dawng thei awmchhun chu United States-a football chawinunga tivultu tur a nih thu leh US soccer history sawidanglamtu tur a nih thu a sawi a, North American men’s professional league dang palite laka MLS larna pawh a chungnung zui zel dawn tih leh khawvela league tha berte zinga tel phak an duhna kawnga phurna thar siamsaktu tur a nih thu a sawi.
Mas hian North America leh United States chu khawvela league ropui ber an ni thei lo a nih pawhin khawvela league sang ber ber pahnih zinga tel phaktir an tum thu a tarlang tel a, Argentine hawilam sawi zuiin, “Lionel Messi hi cup min lakpui tur leh dang-lamna thlentir turin he ramah hian a lo kal a, chu dinhmun thleng tur chuan kei leh he league-a ka thawhpuite bakah club neitu dangte hian mawh kan phur lian hle dawn a ni,” a ti.
Messi Miami zawm hian darkar reilote hnuah danglamna a siam nghal dawrh a, Inter Miami inkhel enna man pawh 1,034% tehrengin a sang nghal a, a team thar Instagram account follower zat pawh reilote chhungin maktaduai khat atangin maktaduai riat a kai chho thawt!
Inter Miami hi tun dinhmunah nghet taka Eastern Conference standing mawngphah luahtu ni mekin, playoff khel pha tura luah ngai hniam ber pakuana lakah point sarih ngawtin an hniam.