Tuirial kama thing leh mau tih chereu veng turin hma la dawn

Tunhnaiah Tuirial kama thing leh mau chu nasa taka vah chereu a ni a, YMA Sub Hqrs Kolasib-in hemi veng tura bul a tan hnu ah sawrkar nen ngawrh zawka beihpui thlak tum a ni.
Nilaini khan Forest minister Lalthansanga hoin department hotute leh YMA Sub Hqrs Kolasib leh Tuirial huamchhunga YMA Group leh Branch hruaitute an thukhawm a. Tuirial kam tih chereu a nih dan sawizau a nih bakah an vei zawngte an sawi.
Rawtna an siam zingah Forest department leh YMA lam hian thing leh mau tichereutute veng turin joint operation neih thin se, chainsaw hman theih dan (regulation) siamthat nise, NEEPCO gate-ah duty post siam dan zawn nise, tih te a tel.
Thudawn danin, khawmah YMA Sub Hqrs Kolasib president Thomas D Lalengliana chuan Tuirial kam thing leh mau tih chereu nasat a ni chunga a humhalhtu tur Forest department-in hma a la lo reng mai chu hriatthiam har an tiin, ramngaw humhalh duhna tak tak an nei lo em ni tih tur khawp a ni tiin, na takin a khak tih sawi a ni.