Tuivai Hydel Project tharthawh dawn

Megawatt 180 siamchhuak thei tura ngaih Tuivai Hydel Project ruahman chu Ningani khan Power minister F Rodingliana’n a tihpuitlin dan tur a hmunah a en.Tuivai HP hi Central Water Commission-in megawatt 210 siamchhuak thei turin kum 1992 khan detailed project report peihfel a ni a, hma lak zui loha a awm reng hnuah, tuna Mizoram sawrkar thar pian veleh he project hi bawhzui nghal a ni a, a tira Mw 210 siam thei tura ruahman chu, tuikhuah tur hian state thenawm Manipur chhung hmun thenkhat a chim ve dawn avangin, sawrkar chuan tuikhuah chim chin hi Mizoram chhung pelh tir loh nise, a ti a; tuiin a chim chin tur tidanglamin Mw 180 tal siam thei turin a ruahman tih sawi a ni.
DPR siamtha a, he hydel project siam thei tur private developer tha thlang chhuak a, tender chhuah leh Mizoram sawrkarin agreement a ziahpui thlenga buaipui tur, transaction adviser ruatna atan sawrkar laipui Ministry of Finance-a Department of Economic Affairs chuan Mizoram sawrkar chu cheng vaibelchhe 2.3 a rawn pe a, heng thil pawimawh buaipui tur hian Ernst & Young LLP chu state sawrkarin transaction adviser atan a ruat a ni.
Heng zawng zawng tipuitling tur hian Ernst & Young hian hma a la mek a. Kum khat chhunga tender chhuahfel hman turin tunah hma lak mek a ni. He hmalakna kal mek hi Power & Electricity minister chuan a hmunah tlawhin, Tuivai khuahna tur hmun pawimawh fangin an tlawh.
Ruahmanna ang chuan, powerhouse hi Phuaibuang ramah dah tur a ni a, tuikhuah (dam) hi Ngopa atanga km.12-a hla, Tuivaia Livawkkuang hmuna sak tum a ni. Tun dinhmunah Mizoram-in kawlphetha a mamawh san lai ber, Mw 163 vel a mamawh a, he project hi tihpuitlin a nih chuan Mizoram chu power-ah a intodelh thei dawn nia ngaih a ni.