Tuivai lei dawh tum sawipui dawn

Tuivai lei dawh tum sawipui dawn
Mizoram PWD chuan Tuivai lui chungah lei dawh rawtin sawrkar laipuiah a thlen a, he thil hi a pawimawh avangin larsap chuan sawipui a tum thu a hrilh.
Nilaini khan Public Works Department chuan larsap Dr Haribabu Kambhampati hnenah an department hnathawh leh hmalakna thenkhat – national highway leh Pradhan Mantri Gram Sadak Yojana (PMGSY) an hrilhfiah a. National highway leh a kaihhnawih hna panga, cheng vaibelchhe 2554.98 hu an thawk mek a; heng zinga NH-108 (Sairang – New Eden Tripura) chu zaa 94 zawh a ni tawh. NH-501A (Lawngtlai – Zochachhuah KMTTP) chu zaa 98.01 zo tawhin, NH-2 (Seiling- Tuivai) huamchhunga km 17.5 a thui chu tunhnai khan zawhfel a ni a, hna dang pahnih an thawk mek bawk.
Heng bakah hian national highway hna thar pathum tan tur an nei a, hna dang paruk pawh Ministry of Road Transport & Highways ah proposal an thehlut a. Heng zing ami Tuivai lui chunga lei dawh tur chu a pawimawh em avangin a hranpaa ministry lam a sawipui tur thu larsap hian PWD hotute hi a hrilh.
PMGSY hnuai hmalakna pawh an sawi a. PMGSY hi kum 2000 atanga thawh tan niin, phase 12 hnuaiah Mizoram pumah project 351, kawng km. 4482.732 a thui cheng vaibelchhe 2840.08 man sanctioned a ni a. Heng zinga project 300 chu zo tawhin, project 51 thawh mek a ni. Sanctioned km. 4482.732 atangin 4247.534 a thui zawh tawh niin, km. 277.735 an la thawk mek. Heng project katlang hian khua 232 zinga 216 chu PMGSY kawng nei tawh an ni.
Larsap chuan PWD hotute chu hna an kalpui mek dinhmun, a hun taka hna zawh loh a nih chhan leh hemi kawnga harsatna an neihte hriat a duh avanga ko a ni tih sawiin, ministry lama sawipui leh thlen a duh vang a ni tih a sawi. Bairabi leh Sairang rel kawng inkara railway station pali awm chu a bulhnaia khua awmte nen inkawlpawhna sial a pawimawh tih a sawi.
Mizoramah national highway sial tawh leh sial mek thui zawng chu km. 1509 a ni a, hemi zinga km. 650 chu state PWD-in a sial tawh leh hma a lak mekna a ni. A bak chu NHIDCL chan an ni. Heng zinga thui ber chu tuna NH-2 tia vuah tak, Seling – Tuipang (NH-54) leh Seling Tuivai (NH-150) suihfin, km.481 a thui a ni.