Tulian nasa vangin Imola race kaltlangpui thei lo

Tulian nasa vangin Imola race kaltlangpui thei lo
Italy hmar lama ruah sur nasain chhiatna a thlen kal zelah kartawpa Emilia Romagna Grand Prix tlan tur chu thulh fel a ni.
Imola race atana inbuatsaihna a kal mek laiin Thawhlehni khan Formula 1 staff-te chu track chhuahsan tura hriattir an ni a, Nilainiah pawh inbuatsaihna kalpui theih a nih loh avang leh tuilianin ziaawm lam a la pan loh avangin F1 race kaltlangpui theih a ni lo.
Nilaini khan tual-chhung thuneitute leh F1 race buaipuitute chuan harsatna thleng mek hi sawihoin, Italy ram tlankawng hmingthang Imola-a intlansiak kalpui chu tun dinhmunah him loin an ngai a, thulh thu an puang ta a ni.
Emilia Romagna bial chhunga tuilianah hian a lo berah pawh mi pariat an thi tih nemngheh tawh niin, mi 5,000 chuang hmun hima sawn-chhuah an ni a, hei vang hian grand prix pawh kaltlangpui ngaihna a awm lo a, F1 thuchhuah chuan race thulh chu tihmakmawh a nih thu an tarlang.
F1 hian Italy rama race kalpui leh hun tur hi an la thlir tha leh dawn a, mahse, fixture (schedule) chep leh tawt lutuk avangin kuminah an huaihawt leh thei kher dawn em tih hi sawilawk a harsa rih.
F1 president leh chief executive officer ni bawk Stefano Domenicali chuan a seilenna khua leh bial Imola leh Emilia Romagna hmuna chhiatna thleng chu hmuh hrehawm a tih thu leh a sawichhuak nghe nghe.
Thawhlehni leh Nilaini atan khan he lai bialah hian thuneitute’n inralrinna thuchhuah (red weather warning) an tichhuak a, a hnu lawkah F1 lam pawhin race thulh a nih thu an puang ve nghal.
Faenza bula inkulh Red Bull hnuaia Alpha Tauri team pawhin thuchhuah siam ve tawhin, Emilia Romagna huam china ruah leh tuilianin chhiatna a thlen chu pawi an tih thu an tarlang.
Imola atanga hmar thlang lam mel 50-a awm Maranello lama thuthmun rem Ferrari factory pawh tuntum tuilian hian a khawihbuai pha ve bawk.
Ferrari team principle Frederic Vasseur chuan thuchhuah a siaman Romagna chu an homeland a nih thu leh mipuite tawrhna a hmuhin a thlep hnawk thei tih a sawi!
Emilia Romagna GP hi season kal laia intlansiak vawirukna tur niin, a zawna chawlhkar thum tlan tura a hmasaber a ni nghe nghe a, a dawtah hian Monaco leh Spain lama tlan tur a ni.
Kumin hi Formula One chanchina race tam ber tum niin, record 23-race calendar-ah Imola hi bawhpelh hlen a nih chuan nikum ang bawk khan race 22 a ni leh thei.
Britain driver ropui Lewis Hamilton chuan tuilianin a tihbuai huam china mite chu an him zel a duhsakpui thu leh invenpuitawn theuh turin a chah a, chhiatna thlengin a tihbuai zawng zawngte an hre reng tih sawi chungin emergency service thatzia thu Instagram lamah a tarchhuak.
World champion and Red Bull driver Max Verstappen pawh tawng chhuak ve tawhin, race an hnukkir a thlawp thu leh buaina tawkte an hre reng tih sawi chungin Emilia Romagna biala awmte chu hun harsa an tawh laia him khawchhuak thei tura intichak tlat turin a fuih ve bawk.
FIA president Mo-hammed Ben Sulayem pawhin amah leh FIA chhungkaw pumpuiin chhiatna thlenna biala mite an tawrhpui thu leh chhanchhuahna hna thawktute an hre reng tih a sawi.
Mercedes khalhtu George Russell chuan kartawp race thulh a nih avangin fans chungah pawi a tih thu a sawi zet a, mi zawng zawng himna dahthupui ber a ngaih miau thuin a chhunzawm.
Italy Civil Protection Minister Musumeci chuan cabinet-ah chhiatna tawhna bial tana euro maktaduai 20 (USD 22 million) a dil thu leh May ni 23-a tuamhlawm dan tur an ngaihtuah huna pharh a nih tur thu sawi chungin he lai bialah hian chawhruala kum khata ruahtui 1,000 mm sur thin a nih laiin tunhnai chhiatna thlentu ni khat leh a chanve lek chhung ruah tla chu hmun thenkhatah 200mm atanga 500mm a tlin thu a tarlang tel.