Tun season-ah Neymar kan hmuh hmel tawh lo

Paris St-Germain striker Neymar chu a kheimit hliam an zai dawn avangin tun season la bang zawng a chawl tluan tawh turah an ngai.
February ni 19 Ligue 1 inkhel pakhata PSG-in 4-3-a an mikhual Lille an hneh tum khan hlanga zawnchhuah ngai khawpin Neymar a inhliam a, second half minute ngana a kal mek laia a kheimit dinglam a tihnat kha endik a nih hnu leh theihtawpa enkawl a ni chungin zai a pumpelh zo dawn ta lo a, risk sang zawk hma-chhawn ai chuan Brazil forward hian inzaina chemte a hmachhawn nge nge a ngai dawn ta a ni.
PSG thuchhuahin a tarlan danin, an striker kum 31 mi hian tunhnai kum engngemawti liamta chhung khan a kheimit dinglamah harsatna neuh neuh a tawk chho reng a, zai loh chuan harsatna lian zawk tawk thei a nih avangin duhthlan tur dang an nei ta lo niin an sawi a, a lo berah pawh thla thum atanga thla li tal a chawlh a ngaih dawn avangin tun season-ah hian khelmual a luh hman a rinawm ta lo a ni.
Tunhnai kum engngemawti liamta chhung khan Neymar hian a kephah dinglamah hliam a tawk deuh zauh zauh bawk.
2022 World Cup khelh lai pawh khan Brazil opening group match-a Serbia an tum tumin a inhliam a, match hnih dang a khelh theih loh phah.
Barcelona player hlui hian a kheimit dinglam a tihnat avangin 2019 Copa America a khel thei lo a; he harsatna avang bawk hian kum 2021 khan chawlhkar engngemawzat a lo chawl tawh bawk.
Tun season-ah Neymar hian PSG tan Ligue 1 goal 13 thun tawhin, assist tum 10 a siamchhuak tling tawh bawk.
Christophe Galtier-a team Paris hian French top-flight title 11 lak tlin tuma an beih meknaah point riatin hma an hruai fal mek a; nizan result tarlan hman loh Champions League round of 16 second leg-ah German club Bayern Munich hmachhawnin, first leg-a sikhat faia an tlawm tawhna atangin an thochhuak zo em tih tarlan hman a ni lo.
Tun season league match hnuhnung berah June ni 3 khian Clermont an tum dawn a, Champions League final an luh chuan June ni 10-ah an inkhel leh ang.