TUNGE RAM HMANGAIH?

By: Dr. C. Lalrampana
A KAMKEUNA
Ram khat, Hnam khat, chi khat, chenna hmun khat, hnamzia rang thuhmun, sakhaw biak thuhmun, tawng thuhmun, tihdan thuhmun neih duhna leh intihbingna leh inthliar hranna awm lova rualkhai taka mipui changkãn duh avanga thi leh thau pãwlha dikna leh takna, rinawmna leh taimãkna nen, inpumkhat tuma ngaihtuahna leh a taka tha leh zung senga beihna, mahni chenna ramri chin chianna hi ram leh hnam hmangaihna chu a ni. Tin, mahni pianna ram leilung ngaisangtu leh chhuangtu, ram dang aia mahni pianna ram tha zawka ngaihna thinlung pua ram hmangaihna leh ngainatna neia hmasawnna tur leh a chhunga chengte inpumkhatna tura theihtawp chhuahna hi ram hmangaihna a ni bawk.
MAHNI HMASIAL
India rama Kristian tamna ber dawttu chu Mizoram a ni a; Kristian zaah 87.16% kan ni. Mahse, Kristian huamhauh; phakar (faker); mi duhãm; mahni hmasial; itsikna ngah; eiruk hmang; pawisak nei lo; leibã ngah; ba ngaihsak lo; rinawm lo; zu ruih hmang; ruihhlo ngaih hmang; smuggler ngah; thenawm ram nek ching; dãwt sawi hmang; uire hmang; khurbin ching; pawisak nei lo; mi pawisa bat huai; loan case ngah; tawngtai duah thiam; sermon thiam; inkhawm tam; sorkar hnathawh dan tawk thiam; intitha; intifel; mi chapo; lãr leh nihna ngaisang; thamna ngaisang; kawngpui dipa biak in leh chenna in sak ching; aia upa zahna tlachham; thil man thunun thei lo, rate mumal nei lova thil zawrh leh hralh ching kan nih vang nge mahni kan inhmangaih em em a, mahni hma sial reng rengin kan nung a, kan unau leh thenawm khawveng chhungleh khatte’n ei leh in tur leh silh leh fen tur tlachham mah se, keimahni kan hniang hnãr phawt chuan kan duh tawk em êm thin. Tisa khawvel (materialism)-ah kan intlansiak a, mawi leh mawi lo kan dãwn lova kan duhzawng leh awh zawng kan neih theihna a nih dawn phawt chuan zah dãwn lek lovin kan tal bawrh bawrh mai thin ni berin a lang.
RAM HMANGAIHTU TLEM
Duan lãwk angin April 1, 2023 khan Union Home minister Pu Amit Shah chuan lehlangin AR-ho Zokhawsanga sawn chhuahna tur; Laldenga Centre lungphum leh project panga dang lungphum a vaiin cheng vbc 2,500 senna tur a rawn hawng a. Hetiang hun tur hi thlir lãwkin Zoram Sorkar chuan AR chhuahsan tur ram mimal tute’n emaw duh duh dana an chei bawl theih loh nan The Mizoram (Registration on use of transfer land) Act 2002 chu Mizoram Gazette 19.12.2002 khan chhuahin hman tan hun atan 23.11.2005 chu ruat fel thlap a ni bawk. Hei bakah hian The Mizoram (Registration on use of transfer land) Amendment Act 2003 pawm a ni tawh bawk. Cabinet meeting pawhin AR rama LSC awm zawng zawng cancel turin a rel tawh bawk. AR ram chhunga LSC nei hi mi 61 lai an ni tih Revenue Minister-in Feb. 10, 2023 khan Assembly Budget Session zawhna a chhannah khan chiang taka tarlan a ni. Tichuan, he hmalakna kal zelah hian AR ram chhunga LSC neitu 61-te chu an ram Sorkara pe let turin ngen an ni a, he ngenna hi tun thlengin mi 10 vel chauhin an la tihlawhtlng a, mi 51 erawh an ngawi rih niin a lang. Ram hmangaihna ruam atanga thlir chuan sorkara LSC pelettute hi an la tlem hle. Mahse, tuma tihluih theih erawh an ni lo, anmahni mimal duhthlanna a ni e.
A TLÃNGKAWMNA
AR ram chhuahsan tur hi kan vei tlang hle a. CYMA pawhin thahnemngai takin a bei a: Kum 2012 khan Joint NGO meeting-in Assam Rifles ram luaha mimal ram neite chu surrender turin an lo ngen tawh a, mahse, tun thlengin he ngenna hian awmzia a la nei tlem hle tih chu kan hre tlang ãwm e. Sorkar lam pawhin mimal zalenna thlirin hun rangkachak (golden chance) a siamsak a, tihdan chitin rêngin a ti a, LSC pe let tura ngenna; show cause notice etc. nen kawng tinrengin hma a la a ni. Mahse, heng hmalakte hi a sãwt vak lo a nih hmel hle. Hetianga a kal zel a nih chuan AR ram chhunga LSC 51+10-te hi Sorkarin a sut (cancel) ngei dawn tih chu a chiang ta a; Sut a nih hun chuan lehlamho hawi lam tur chu sawi tam ngai lovin a hriat theih sa a; chuvangin, innawr deuh hat chu a awm ngeiin a rinawm. Hetah tak hian Zoram mipuite kan tanrual hun lai tak tur a ni ang. AR chhuah hma zawng AR lammual pawh mipui kuta a awm theih loh avangin hreawm kan ti a, kan phun kan phun a, AR chhuahsan hnua harsatna la awm cheu tur anga thil lo la awm thei hi ram hmangaihtu kan nih chuan a huhovin tharum thawh lo (non-violent movement)-a theihtawp chhuaha do tlan a ngai dawn a ni tih a lang chiang ta hle. Hetih hunah hian-“Tunge Ram hmangaih?” tih zawhna chhanna chu a takin a lo lang tawh ang. Engpawhnise, dawhthei takin i lo thlir phawt mai teh ang u.