Thawhtanni khan Tur-key leh Syria ramah lir rapthak tak nghingin, khaw-vel chanchinthar luahtu a ni a; ruang tam tak hmuh-chhuah tawh a nih laiin chin hriat loha bo la awm nual tura ngaih a ni a, in chim hnuaia bo zingah hian Ghana international winger Chris-tian Atsu pawh a tel.
-- Advertisement --
Atsu hi Turkey ram khawpui pakhat Hatay-a a chenna apartment building chimin a delh a, he hu buatsaih lai thleng hian hmuh a la ni lo.
Turkish top-flight team Hatayspor-in Pathianni zana sikhat faia Kasimpasa an hnehna goal awmhhun khungtu niin, hun pekbelh minute 97-a chakna goal a thun atanga darkar tam lo takah a chenna khawpui chu lirnghing nat zawng tehna magnitude 7.8 zeta nain a sawi a, a chin hriat zui a ni ta lo.
Hatayspor vice president Mustafa Ozat chuan Turkish TV station Play Spor hnenah Christian Atsu bakah an club sporting director Taner Savut pawh in chim kara a la pilbo thu hrilhin, BeIN Sports hnenah an player leh official engemawzat chu in chim atang hian chhanchhuah an ni a, an club pawhin midangte puih hna an thawk ve bawk tih a hrilh.
Kum 31 mi Atsu hian Turkey a pan hmain Premier League lamah Chelsea atangin Newcastle United leh Everton tan loan-in a khel tawh a, nikum September thla khan vanduaina a tawh takna ram Turkey-ah lutin, a bo thlenga a khelhna Hatayspor a zawm.
2016/17 season-a Championship atanga Premier League a kaipui club Newcastle chuan Twitter lamah thuchhuah siamin, an player hlui chungchanga chanchin lawmawm lam an hriat ngei theihna’n an tawngtai tih an sawi a; Chelsea pawhin an tawngtaipui thu an chhuah ve nghal.
Ghana Football Association pawhin Twi-tter-ah bawk thuchhuah siamin, “Ghana inter-national Christian Atsu bakah Turkey leh Syria ram lirnghing tuartute tan kan tawngtai a, chanchin tha lam kan beisei reng a ni,” a tiin.
Ghana tana khel tura Atsu an thlan hnuhnun ber chu kum 2019 daih tawh kha ni mah se a bo thleng khan international football atanga official-a a chawlh thu a la puang lo.
Hatayspor chauh hi Turkey ram football club zinga lirnghing tuar an ni lo a, he chhiatna hian he rama footballer leh infiammi dang engngemawzat pawh a man a; Yeni Malatyaspor club tana khel Turkey goalkeeper Eyup Turkaslan pawh inchim kara tang zingah hian a tel.