Turkey rama chak Bayern Munich

Group A hmahruaitu Bayern Munich chuan Thawhlehni zanah 3-1-a mualneitu Galatasaray hneh lehin, khelh thuma point kua nen an hmahruaina an sawhnghet a; Real Madrid ang bawkin Bava-rians pawh hian England inter-national forward lei fuh Harry Kane an kawl a, Turkey ramah pawh Tottenham captain hlui hian goal khat a thawh bakah assist vawikhat a nei tel.
He inkhela goal hmahruai hi minute riatna leka Kingsley Coman tihluh niin, darkar chanve an khelh tlin rualin Argentine forward Mauro Icardi chuan Panenka pe-nalty tuihnai zet hmangin Galata-saray siphurh a sut a; second half laihawlah Kane chuan mikhual team hmahruailetna goal thawhin, minute 79-ah Jamal Musiala goal tur a siamsak zui leh bawk.
England captain Kane hian Bundesliga season kal laiah pawh match riat atangin goal kua a thun tling tawh a, goal bawh kawnga Bayern Munich innghahna nih a tlin kal mek.
Galatasaray khelmuala an chak leh nen Bayern hi Cham-pions League group game an khelh hnuhnung vawi 16-ah an la chak vek a ni.
Hliam avanga an player engngemawzat Turkey rama hruai thei lo Bayern hian compe-tition-record siamin Champions League group stage match 37 chhung tehreng tlawm an pum-pelh tling ta hial bawk!
Turk-ho kha inelna hrang hranga match 23 zet tlawm pum-pelh tluang lai an ni a, Bundes-liga giants lakah meuh chuan an tang zo ta lo a ni.
Group A inkhel dangah an game hmasa pahniha tlawm ve ve Manchester United chuan Old Trafford-ah hnehna lawm tur nei ve tain, an mikhual FC Copenhagen lakah 1-0 hnehna an chang hram a, khelh thuma point thum nen table-ah pa-thumna an luah chho a; a mawngphah Copenhagen-in point khat an hum ve tawh bawk.