LBS Suzuki chuan Bawngkawn Chhimveng, Aizawl-ah two-wheeler hlui zawrhna dawr ‘Best Value’ an hawng thar a, two-wheeler hlui an lei nghal thei bawk. He dawrah hian tunah chuan Suzuki kutchhuak chauh an la chhawp chhuak rih dawn a, nakinah chuan company hrang hrang kutchhuak pawh an la huam tir vek dawn niin an sawi. He dawr thar hi Anupam Singh, Service Zonal Manager East-in a gawng a ni.
LBS Suzuki hotu Ngurdingliana chuan sumdawnna bul an tanna chu secondhand two-wheeler zawrh a nih thu sawiin, chu chu kum 20 vel liamta kha, tuna Best Value an hawnna hmunah ngei hian, feet 12 bial vel dawr neiin bul an tan niin a sawi a, tun dinhmun an thlen theihna tura Pathian hruaina leh malsawmna an dawn zawng zawngah lawmthu a sawi bawk a ni.
He dawr atanga two-wheeler hlui lei te chuan kum khat warranty an neih bakah a thar lei ang deuh thoin, free servicing vawi thum a awm dawn bawk a ni.
Best Value atang hian two-wheeler hlui a lei theih mai bakah a hralh theih bawk a, an nin two-wheeler hlui te chu a hlutna chhut dan tur kalhmang an neih sa hmangin an lo chhut mai dawn a ni. Hetiang deuh bawk hian Best Value atanga two-wheeler hlui lei dawnin, two-wheeler hlui dang neihsa te chu a hlutna an chhut hnuah a thleng nan/ a man aiah a hman tel theih dawn bawk a ni.
Two-Wheeler hlui lei leh hralh theihna LBS Suzuki Best Value an hawng ta
Get real time updates directly on you device, subscribe now.