UCL semi-final hnuhma langsar

Thawhleh zan leh Nilai zan khan UEFA Champions league semi-final thawhhnihna khelh a ni a, Inter Milan leh Paris St Germain ten hnehna changin final an lut. UCL semi-final a hnuhma thar, chhinchhiahtlak zual kan tarlang ang.
Inter Milan 7-6 FC Barcelona
Semi-final thawh khatnaah 3-3 a inhnehtawk tawh Inter Milan leh Barcelona te chu San Siro-ah intawng nawn lehin hun pangngaiah 3-3 bawkin an inhnehtawk a. Extra-time a Davide Frattesi goal thun hmangin Inter Milan in 4-3 in hnehna an chang a. Inter Milan hi si belhkhawmah 7-6 a chakin final an lut. Inter leh Barca hian UCL semi-final a goal lut hnem 2017-18 season a Liverpool 7-6 AS Roma record an nihrual.
Inter Milan hi UCL final an luh vawi thumna a ni a, vawi khat an lo champion tawh a, European Cups ah vawi hnih an lo champion tawh bawk. Inter laka tlawm Barcelona hi season 10 chhung zet UCL final an lut zo lo tawh a, UCL final an khelh phak loh zawn rei ber a ni ve thung.
San Siro-a inkhel hmuhnawm takah hian Francesco Acerbi chuan goal pawimawh zet mai a thun a, Inter Milan tlawm tur a chhanhim. Inter Milan si phurh sut zotu Acerbi hi kum 37 leh ni 86-a upa a ni a. Ryan Giggs ((37 yrs and 148 days) hnu lamah UCK Knock-out stage a goal thun upa ber a ni.
Barcelona hian UCL math hnuhnung pathumah goal 10 zet an chhuah a, an che chhe hle. UCL season kal mekah khelh 11 atangin goal 14 chiah an chhuah thung. Catalan club lian Barca hian UCL 2024-25 ah goal 43 zet an thun a, UCL season khata goal thun hnem ber record an nih rual.
Inter Milan an chak theih nana thawhhlawk tak Yan Sommer chuan Barcelona lakah save tha zet zet vawi 14 zet mai a nei a, UCL semi-final (first & Second leg) a save ngah ber dawttu niin a chungah save vawi 15 nei Jan Oblak a awm.
Inter Milan captain Lautaro Martínez chuan Barcelona lakah goal 3 a thun tawh a, season sarih liam ta chhungin Barca lakah Martinez aia goal thum tamte chu Mbappé, Guirassy leh Thomas Muller te chauh an ni. Martiz hian UCL season kal mekah goal 9 a thun tling tawh a, Argentina player zingah UCL season khata goal 9 chin thun thei pathumna a ni a. Argentine zingah UCL season khatah amah aia goal thun tam awmchhun chu Lionel Messi chiah a ni.
Barcelona tana chetha tluang tak Raphinha chuan UCL season kal mekah goal contribution 21 zet a nei a. Season khata UCL goal contribution nghah ber Cristiano Ronaldo record a nihrual. Raphinha hian UCL season kal mekah goal 13 a thun a, Serhou Guirassy nen top-scorer an ni dun mek bawk.
PSG 2-1 (3-1) Arsenal
Nilai zan khan Paris St-Germain chuan Mimualah 1-0 a an lo hneh tawh Arsenal chu an mualah 2-1 in an hneh nawn leh a, 3-1 a hnehna changin a vawi hnih nan UCL final an lut. PSG hian Marseille hnung zuiin UCL-ah French club champion theih nih tumin Inter Milan an hmachhawn zui leh ang.
Semi-final a Arsenal hnawtchhuaktu PSG hian UCL season kal mekah English club an hmachhawn zawng zawng; Manchester City, Liverpool, Aston Villa leh Arsenal te an hneh vek a, English club an ngam hle. PSG hian UCL season kal mekah counter attack atangin shot vawi 31 zet an nei a, counter attack atanga shot nei hnem ber niin, goal 5 lai an thun nghe nghe.
Arsenal lakah hian Fabian Ruiz chuan pui zetin hmahruaina goal a thun a, Ruis hian UCL a hmachhawn tawh vawi 46 atanga goal khat a thunna chiah a ni.
UCL final-ah PSG leh Inter Milan te an inhmachhawn dawn a. hei hi European Cup final-ah France club leh Italy club an inhmachhawn vawi hnihna chiah tur a ni a. Kum 1992-93 khan final-ah Marseille leh AC Milan an intum a, Marseille in 1-0 in hnehna an chang a, French club zingah European competiton a champion thei awmchhun an la ni ngar ngar.