UD&PA minister-in Lungleia project lian zual an bawhzui mek ho puang

UD&PA minister-in Lungleia project
lian zual an bawhzui mek ho puang
UD&PA minister K Sapdanga chuan Lungleia an department-in hmasawnna hna a thawh mek ena an thawhchhuah chhan hrang hrang MJA Lunglei member-te hnenah a puang.
Minister chuan tun tuma Lunglei an tlawh chu tum bik nei leh thu lawmawm kenga kal an ni tih a sawi a. Lunglei Municipal Council-in Lunglei mipui tana hna a thawhna kawngah hun rei tak hna thawk hleithei loa a awm hnuah, UD&PA Secretariat leh Directorate nen an harsatna chinfel dan tur uluk taka ngaihtuahin, a tul anga an mamawh ngaihtuahsaka tlawh an ni tih a sawi a. Lunglei hmasawnna atana hmalak dan turah LMC hotute leh Lungleia MLA-te nen rilru inhmu takin thil an rel ho tih a sawi.
Lunglei khawpui tana UD&PA-in a ruahman hmasawnna project lian zual sawiin, State Priority Project (SPP) hnuaiah cheng nuai 1750 hu project lian 5 kalpui mek a awm a. Cheng nuai 400 senga Sazaikawna LMC Complex dinna atan ram lei tura biakfel tawh, a man pe hleithei loa kum hnih an awm hnuah, tunah ram leina tur sum an inhlan a fel ta tih a sawi. LMC Complex sa tur hian contractor thlan a ni tawh a, hna an tan nghal thei dawn tih a sawi a ni.
Minister chuan SPP hnuaiah hian cheng nuai 350 senga lirthei lian leh te din khawmna tur – Transport Hub sakna atan Theiriatah mimal ram lei a ni a, a man pek tlakna tur tunah an fun phei a, contractor thlan a ni tawh a, a rem veleh an bung tan thei dawn tih a sawi. Cheng nuai 200 senga Ramthar AOC Market Shed sakna tur pawh buaipui mek a ni, tiin, cheng nuai 300 senga C Thuamluaia Mual bula lirthei dahna – Multi-Level Car Parking sak hna chu contractor-in an thawk tawh a, a hmun an lai zo lek lek tawh tih a sawi a. Saikuti Hall cheithatna atan cheng nuai 500 dah niin, dawhsan, thutna, lighting & sound, a chung leh thil hrang hrang thlak ngai thlak leh siamthat a ni dawn a, a rang thei ang bera hna tan tum a ni tih a sawi bawk.
Urban Infrastructure Development Fund (UIDF 2025- 2026) hnuaiah Lunglei khawpui tan cheng nuai 525, Lunglei Park cheithatna atan nuai 200 dah a ni a; khaw that veleh contractor-in hna a tan nghal dawn tih K Sapdanga hian a sawi a. Khawlaia vantlang inthiarna in (pay and use toilet) set khat cheng nuai 25 zelin hmun 4-ah cheng nuai 100 senga siam tum a ni a, bul tan theih thuai beisei a ni tih sawiin, a enkawlna atan inthiar man erawh a awm a ngai dawn tih a sawi. Khawpui chhunga kea kalte veivahna footpath cheithatna atan nuai 225 dah a ni a, khuain a zir chuan thawh tan theih thuai beisei a ni tih a sawi a ni.
Lunglei MJA member-te hian sawrkar hmalakna hrang hrang hriat duh an neihte UD&PA minister hi zawtin, rawtna leh mamawh an neih an thlen bawk a. Minister chuan an zawhna chhangin, an rawtna leh mamawh chu chhinchhiah a, a tul anga an enzui a nih tur thu a sawi.

Lunglei tana hmalakna dang UD&PA minister-in a sawi chu:
8 SASCI Part-XB hnuaiah Lunglei khawpui chhung hmasawnna hna hrang hrang 80 thawhna tur cheng nuai 200 dah a ni a. Municipal-in a enkawl chhunzawm dawn. Councillor-ten an ward theuha thawh dan tur an siam fel tawh a, hna tan theih thuai beisei a ni.
8 SASCI Part-V atangin damdawi in bawlhhlawh, mipui tana hmuh hrehawm leh him lo tihralna tur leh, damdawi in chhung hmanrua tihral leh sawngbawlna atan Theriatah Common Bio- Medical Waste Treatment Facility din tum a ni a. Ram neih fel a ni tawh a, a sakna atan cheng nuai 1400 ruahman a ni. Chhimlam district pali dawl zo tura ruahman a ni a, tender tura lehkha pawimawh buatsaih mek a ni.
8 SASCI Part-XIII hnuaiah kawr lian, hlauhawm siam thei leh a muala tawlh thin tihdam leh venna tur storm drain siamna atan cheng vaibelchhe 10 ruahman atangin Lunglei atan cheng nuai 250 dah a ni. UD&PA atanga Lunglei khawpui tihhmasawn leh cheimawina atana hmin sa, hna thawh mai tur tun tuma an feh chhuahpui chu a vaiin cheng nuai 5387 hu a ni.
8 Lunglei khawpui tan UD&PA project zawng zawng chu rulh leh ngai chi a awm vak lo a; project tam zawk chu sum hnar awm tur a ni zawk dawn. Lunglei khawpui enkawlna atana sum tuakna tur project deuh vek a nih avangin a phurawmin a lawmawm takzet tih a sawi.