UEFA Champions League final 2003 – 12:30 AM Manchester City vs Inter Milan

Football ngainatute ngahhlelh rawn UEFA Champions League final chu zanin zanlai dar 12:30 hian khelh a ni dawn ta a. Istanbul khawpuia Atatürk Olimpiyat khelmualah Premier League champion Manchester City leh Italian Serie A club lian Inter Milan an inhmachhawn dawn.
Final-a intum tur Manchester City leh Inter Milan te hi inelnaah an la inhmachhawn ngai lova, zanin hi inelnaa an hmachhawn hmasakna ber tur a ni. Final thlenga an khelh chhoh dan leh an player te khaikhinin EPL champion Manchester City hi champion tura rinkai zawk an ni. City hian position tinah player tha tak tak an nei a. Midfielder ball thiam leh tawnhriat ngah Kevin de Bruyne, Ilkay Gundogan, Bernardo Silva leh Jack Grealish ten goal thun thei em em mai Erling Haaland an chawm rawn leh tur hi Inter Milan tan dan an har viau tura ngaih a ni. Player ngaihven hlawh tur Haaland hian UCL season kal mekah goal 12 thunin, top-scorer a ni mek a. Final-ah goal thuna a City a champion pui thei a nih chuan City chanchinah a hming hi a dai leh tawh ngai lo ang.
Pep Guardiola enkawl City hi inelna pahnih; English Premier League leh FA Cup-ah an champion tawh a, tui let hnu lama a vawi khat nan treble champion nih an tum a. Treble champion ni thei turin Inter Milan an hneh a ngai dawn. City hian champions league final an khelh vawi hnihna tur a ni a. A vawikhat nan European champion nih tumin Inter Milan lakah an theihna sang ber an hlan ang.
City hi UCL group stage-ah Group G-ah awmin Borussia Dortmund, Sevilla leh Copenhagen te nen an awm tlang a, an tan group harsa a ni lo. Group champion an nih hnuin last 16-ah RB Leipzig chu 8-1 ngawtin an sawp a, quarter-final an lut. Quarter-final-ah khingpui hautak tak an nei a, German champion Bayern Munich an hmachhawn. German champion hi si belhkhawmah 4-1 a hnehin semi-final an lut a. Semi-final-ah kum hmasa lama lo hnawtchhuak tawhtu, European club te hlauhawm Real Madrid tumin, fiahna hautak an hmachhawn a. UCL a club hlawhtling ber Real Madrid hi si belhkhawmah 5-1 a hneh zui lehin final an inhlangkai ta a ni.
Italian club lian Inter Milan hi group harsa takah awmin, Group C-ah Bayern Munich, FC Barcelona leh Plazen te nen an awm tlang. Bayern Munich leh Barcelona te aia rinkai lo zawk ni mah se pahnihna ni chungin last 16 an lut. Last 16-ah FC Porto paltlang hramin quarter-final an lut a. Quarter-final-ah club lian pumpelhin Benfica an hmachhawn a, 5-3 a chakin semi-final an lut. Semi-final-ah ram dang club an pumpelh hlauh a, an hriat than AC Milan nen final luh an inchuh. Italian champion lakah 3-0 ngawtin hnehna an chang a, final an lut.
Inter Milan hi champion tura rinkai zinga tel phak lo chungin bul an tan a, chetha hlut lo mah se an tlo riau a, final an lut ta hial. Final-a an khingpui tur Manchester City lakah pawh rinkai zawk an ni phak lo leh. Italian club reng reng hi defensive thiam, game pawt muang a, an game-a team dang hruai luh thiam tak mai an ni a. Manchester City ngei pawh hi an game-ah hruai lutin, trophy chawi zawkah an tang lo ang tih a sawi lawk theih loh a. Inlehthalna lian thlentir tumin an theihna sang ber an hlan ang.
Inter Milan hi rinkai lo zawk ni mah se champions league-ah chuan City aiin hnuhma an nei tha zawk viau thung a, vawi thum an champion tawh. An champion hnuhnun ber tum chu kum 2010 daih a ni thung a. Kum 13 zet hnuah football club te inelna ngaihhlut hlawh ber champions league-ah champion tumin zanin hian Manchester City an hmachhawn ang.