Ukraine-in Black Sea-a Taman lawngchawlhna kap

Russia-a Black Sea lawngchawlhna, Taman chu Ukrainian drone-in beih a ni tih Russia-a Krasnodar region governor-in Pathianni khan a sawi.
Taman lawngchawlhna hi tuialhthei thar chhuah, buhfai lam chi, lungalhthei leh ni tin mamawh phurh luhna leh phurh chhuahna hmun a ni a, drone hmanga beihna avang hian a chhia niin governor chuan a sawi.
Volna khuaa tuialhthei dah khawlna, kudam leh terminal beihnaah hian mi pahnihin hliam an tuar niin Veniamin Kondratyev-a hian Telegram-ah a tar lang a ni.
Kondratyev-a chuan lawngchawlhna hi a kang nasa hle a, a thelh turin mi 100 chuang an thawk chhuak tih a sawi bawk.
Chawlh hmannaa khawpui, Sochi leh tuipui kam khua, Anapa bula Yurovka khua pawh beih a ni a, hetah erawh chuan pawi lian tham khawih a ni lo hlauh niin a sawi bawk.
Ukraine hian tun hnaiah Russian energy hmunhma leh hmunpuite a bei thar nasa a, a hma khan US rawtna angin energy hmunte hi inbeisei rih lo turin an inti a, hei hi a tawp tak avangin an inbei thar leh nasa hle tawh a ni.
Russia pawh hian Ukraine-a an energy hmunpui leh a sem darhna hmunhmate an bei nasa a, hei vang hian thlasik khaw vawt vin tak karah Ukrainian-te chuan intihlumna tur leh electricity an khaihlak phah nasa hle.
US vek hmalaknain ram pahnih inkara remna a awm theih nan indawrna kalpui mek zel a ni bawk a, hetih lai hian vawi tam mi dang kaltlangin an inbe tawh a, tun hnaiah US telin ram pahnih aiawhte an indawr leh bawk a, rah tha lam erawh a la awm hleithei lo.
Ukraine-in a kah chhiah, Taman lawngchawlhna atang hian nikum chhung khan tuialhthei thlitfim loh metric ton maktaduai 4.16 lai thawn chhuah niin an sawi.