Ukraine-in hmasawn mek ti

Pro-Russian forces tena Ukrainian sipaite chuan east Ukraine lamah hma an sawn a tih chu Russia defence ministry chuan a hnawl.
Yevgeny Prigozhin, head of the Wagner mercenary group Russia thlawpa Ukraine dotu chuan Russian sipaite chu Bakhmut leh a chhehvela an inbunnate rauhsanah a puh.
Russian military bloggers chuan Ukrainian sipaite chu Ningani khan Bakhmut hmun tam takah hma an sawn tiin a sawi a.
A hmain Ukraine president chuan counter offensive kalpui turin a la hma lutuk a ti thung a. “Kan neihsa tawh te hmang chuan hma kan sawn thei a, kan hlawhtlin ngei pawh ka ring,” tiin President Volodymyr Zelensky chuan a sawi a.
“Mahse, mi tam tak kan chan dawn a, chu chu pawm theih a ni lo. Hei vang hian kan ngah a ngai a, hun kan la mamawh a ni,” tiin a sawi.
Ukraine hian nawr let tumin a bei ngei dawn a, tun thlengin Russia-in a awp chin chu danglam a la awm lo thung. Ukraine chuan khawthlang ram atanga ralthuam leh bungrua a dawnte hmangin hma a sawn thei ang ber tih chu thlir ber a ni mek bawk.
Russia defence ministry chuan “Mi malin Telegram kaltlanga frontline a hmun tam takah Ukraine ten an sutlang a tih chu thil nihna dik tak a ni lo,” a ti a, “Special military zone hi kan thununna hnuaia la awm a ni,” a ti bawk.
Prigozhin erawh chuan Bakhmut hmatawng teah thil danglam a thleng a ti thung a. “Kan unaute thisen luanga firfiakte hun rei tak kan do tawhte chuan kan luah chin ram veng tura ngaih tena an ven that loh avangin ni tin metre za telin hma an sawn mek a ni,” tiin a sawi.
Pro-Kremlin Russian war correspondent Sasha Kots chuan Kyiv-in counter offensive kalpui a tum chu a bul a tan der tawh tiin a sawi a.
Ukrainian tanks te chu Kharkiv ring road-ah Russia nena ramri panin a kal mek tiin a sawi bawk a. “Kyiv chuan northern front lam atangin beihletna a tan mek a ni,” tiin Kots chuan a sawi bawk.
Ukrainian military analyst Oleksandr Musivenko chuan Kyiv beihletna chuan Russia chu a ram awp tinah a hneh vek ang tihna a ni lo a ti a, indona hian nakum pawh a la hawlh thleng thei ang a ti bawk a.
Bakhmut bik lak tuma beihnaah hian Western officials te chuan Russia chuan sipai 20,000 atanga 30,000 a hloh tawh tiin an sawi a, Ukraine pawhin a chan nasa hle a ti bawk.
Nikum 24 February-a Russia-in Ukraine a run hnuah civilian leh sipai thi leh hliam a sing tel an awm tawh a, khawpui leh khua tam tak tihchhiatin a awm tawh a, Ukrainian 8.2 million raltlana awm tawhin heng zinga 2.8 million te chu Russia-a tlanchhiate an ni.