Pathianni-ah Thailand-in inthlanpui a hmachhawn dawn a, campaign nasa taka neih mek niin a lan danah Thai party te chuan sorkar-na an siam leh hmel hle.
“Pheu Thai-in chakna a chan chuan mi tin nunin a that phah dawn a ni,” tiin voters te chu an ngen a.
Pheu Thai (Thais te tan) party te chu an elpuite lakah an chungnung fal rih hle a. Tun hnai kum 17 chhung zet chu tihhniam tuma nasa taka beihna an tawk chungin leh Thaksin Shinawatra, telecoms billionaire kum 1998 a Thai Rak Thai dintu hnawl tura beihna a nasa chungin an huhang a la na ngang mai.
Thaksin sorkar kha kum 2006 khan sipai ten an paihthla a, Thai Rak Thai chu thiahin a awm zui kha a nia. Khata tang khan ram pawnah la awm rengin politics thilah thiamloh nasa tak chantir a hlauh vang a ni. Chu mai ni lovin an party siamthar leh pawh kum 2008 khan court-in a thiat leh a, an prime minister pahnih pawh banin an awm zui bawk.
Chumi hnuah Thaksin farnu Yingluck chuan kum 2011 inthlanah hnehna nasa takin a chang leh a, mahse, amah pawh court-in a disqualified ve leh a, a sorkar pawh siapite bawkin thiatin thuneihna an la leh a, Yingluck pawh hi ram pawnah awmin a tlanchhe mek a ni.
Inthan hnuhnung ber kum 2019 khan Pheu Thai te chuan party dang zawng te aiin seat an la hnem bawk a, mahse, sorkar siam phalsak an ni leh bawk.
Tun inthlan turah poll atanga a lan dan chuan Pheu Thai te bawk chuan chakna an chan leh hmel hle a. Shinawatra family chuan Thaksin farnu naupang ber Paetongtarn chu hmathehah an nei leh a, rai puar teuh chunga campaign neiin chu chuan amah ngaihsanna nasa tak a thlen zui bawk.
Campaign auhla an neihah minimum wage tihsan te, puitling chin tawh mi tin hnenah an digital wallet ah 10,000 baht dahsak te pawh a tel a.
“Kum riat meuh a ral hnu chuan mipui ten policy tha zawk, sipai ten sorkar an paihthlak leh ringawt lo hmuh an duh tawh a. Policy an nuna danglamna thlentu hmuh an duh tawh a ni,” tiin Paetongtarn chuan a sawi.
“Kum tam tak chhung chu political force dang ten Pheu Thai chu policy zawrh chungchangah te, charisma leh mipuite nena inzawmna siamah te an cho pha ngang lo a ni,” tiin Siripan Nogsuan Sawasdee, political scientist, Chulalongkorn University chuan a sawi a.
“Tun hnai lawkah sipai ten sorkar paithlain tum hnih thuneihna an chang tawh a, mahse, economic performance lamah an che chhe thlawt a, Covid pandemic hmachhawnnaah khan an che chhe bawk a, hei vang hian mipuite chuan Pheu Thai an ngainatna a san zual phah,” tiin a sawi bawk.
Siripan chuan Thailand-a politics thila hlawhtling tur chu three P’s – policies, personalities leh patronage network bakah political values a ngai a ti bawk a.
A hmasa berah hian Pheu Thai te chu an khauh hle a. Thai Rak Thai te chu kum 2001-a modern, manifesto-based campaign kalpuitute an ni a. Universal healthcare leh village-based micro-credit scheme te thingtlang leh sum lakluh hniamte puitu pawimawh te chu an larpui vet vet hle. Hei vang tak hian Shinawatra family te chuan vote bank lian ber thiah darh theih loh tluk tia sawi an neih phah an ti bawk.
Pahnihnaah Pheu Thai te chuan local power-brokers network zau tak siamin chu chu an lar zual zelna tura hmalakna a ni a. Chutih laiin conservative party dang pahnih coup-leader hlui Prayuth Chan-ocha leh a thawhpuite din chu an la thar si a, local network khauh an nei bawk si lo a ni.
Pathumnaah Pheu Thai te chuan mipuite ngaihsaktu angin an inzuar a, inthlan hmanga mipui sorkar dina democracy champion puitu angin an inchhuah bawk a. An auhla berah pawh conservative, sipaite thlawp tihtawp i duh chuan i thlan tur awm chhun kan ni, an ti.
Tun tumah erawh political values lamah chuan radical leh youthful party zawk Move Forward te chuan an khum thung a, anni hian Thailand power structure siam danglam an duh a ni.
Politics-ah sipaite inrawlh theih ngai miah tawh loh an duh a, sipai budget pawh tihtlem duh an ni a, chu mai bakah monarchy pawh mawhphurhna sang zawk nei tura duan an duh bawk.
Move Forward te hian Pheu Thai voters te an la hek ber tura ngaih niin a bik takin thalai zawk tena an bawh nasat a ni.
Hei mai bakah hian Pheu Thai te chuan policy lama chungnung ber an nihna an hloh bawk a, tunah chuan party dangte pawhin voters te neih theih nan sum lam an tawktarh vek bawk a, a hma chuan hei tak hi Pheu Thai tena inthlana chakna an chan phah thinna a ni.
“A bik takin thalai zawkah Thaksin legacy a tun hmaa an policy an tihlawhtling thin tih vel chuan awmzia a nei vak lo,” tiin Sirian chuan a sawi a, “Kuminah hian vote tumkhatna thlak chauh tur maktaduai li vel lai an awm a. Pheu Thai te hi Move Forward te chuan an la hek nasa a ni,” a ti bawk.
“Mahse Pheu Thai te hian chakna nasa takin an chan ka la ring zawk tho va. A chhan chu second P – patronage network an candidate ten a bik takin hmar leh hmarchhak lamah an nei tha em a, Move Forward te chu party thar an nih avangin hetianga inzawmna tha an la siam thei lo,” tiin Siripan chuan a sawi bawk.
Opinion poll a dik a nih chuan Pheu Thai leh Move Forward te chuan lower house-a seat 500 awmnaah majority nei thei an ni dawn a, mahse, a pawimawh ber zawk sorkar siamtir remtih an ni ang em tih chu zawhna a ni.
Military draft constitution-ah chuan senator 250 lai sipai tena an ruat vel te chuan prime minister thar tur thlannaah vote an nei thei a ti a. Hei vang hian harsatna awm thei a awm dawn thung.
Thailand chu tun hma ang thova authoritarian thuneihna hnuaiah a awm zui zel dawn nge inthlan hmangin thuneihna hlanchhawnna a awm dawn tih chu khawvel thlir mek a ni a. Sipai tena thuneihna thuk tak an nei tlat thung a, chu tak chu Thai mipui a bik takin thalai zual lam ten an hnein kalsan an duh nia sawi a ni a, chuvang tak chuan Move Forward te pawh an bawh phah an ti bawk
Thailand-ah Shinawatra family-te lar reh thei lo
Get real time updates directly on you device, subscribe now.
Next Post