Ukraine chuan an ram chhim chhak lama khaw pathum chu beihpui an thlak mekah Russia awpna a\angin an chhuah zalen tiin an sawi.
Ukraine chuan an ram chhim chhak lama khaw pathum chu beihpui an thlak mekah Russia awpna atangin an chhuah zalen tiin an sawi.
Social media-a tarlanah Ukrainian sipaite chuan Donetsk region a Blahodatne leh Neskuchne leh a thenawm vela chakna changa an lawm lai tarlan a ni a. Kyiv deputy defence minister chuan Makarivka pawh an thunun thu a sawi bawk.
Kar kalta Inrinni khan President Volodymyr Zelensky chuan beihlet beihpuithlak runpui an kalpui tan thu a lo puang tawh a. Chumi hnuah khua pathum chu an la ta phawt a, mahse, Moscow chuan engmah sawi a la nei lo va, Ukrainian beihletna a dang chat zel ti erawhin a sawi.
Hetih lai hian Ukraine chuan Russia-in Zaporizhzhia region-a tuikhuah dang Nova Kakhovka a bomb chhiat hnuah a tichhe leh tawh tiin a sawi a. Nova Kakhovka tihchhiat avang khan tuilian nasa tak thlengin mi 4,000 chuang hmun himah thiar chuhuah an ni a. He Dam hi Russia chuan February 2022 atanga a thunun tawh a ni a.
Ukrainian sipai thupuangtu Valeriy Shershen chuan Moscow sipaite chuan Novodarivka khaw bula Dam pahnihna chu an bomb chhe leh tiin a sawi a.
Shershen chuan Dam bomb chhiat hi Ukrainian sipai tena hma lam an pan zel tur dan tumna tiin a sawi bawk a. Mahse, Russia chuan Nova Kakhovka dam chu a tihchhiat ni lovin Ukraine tihchhiat a ti ve hlauh thung.
-- Advertisement --
‘Ukrainian flag hnuaiah’
Pro-Ukrainian account social media lamah Ukrainian flag te chu Blahodatne a building-ah te tar leh vai a ni tawh a.
State border guard-te pawhin video an tihchhuahah ‘Neskuchne of the Donetsk region chu Ukrainian flag hnuaiah a awm’ tia sawiin “Glory to Ukraine” tiin an au rual bawk. Deputy Defence Minister Hanna Malia pawhin Telegram-ah video hmangin Ukraine sipaite chuan Makarivka khua pawh an la tawh tiin a sawi bawk a.
Heng khua pathum lakte hi tun hnaia Ukraine-in hnehna a chan lian ber niin hmasawnna nasa tak anga ngaih a ni a, Blahodatne-ah hian mihring 1,000 vel cheng anga ngaih an ni a.
He khua hi Mariupol panna kawng pawimawh niin Ukraine chuan Mariupol lak tuma a beihna lamah Blahodatne hi a la hmasa phawt tiin analysts te chuan an sawi a. Hei bakah hian Kyiv chuan Crimea leh Donetsk land bridge tihtawp tumin Peninsula-a Russian sipaite chu tangkhanga siam a tum an ti bawk.
Khawchhak lamah Ukraine sipaite chuan sawp nasat tak Bakhmut chu an hnaih tial tial tia sawi a ni a. Thawhtanni khan Ukrainian General staff chuan inbeihna tum 25 a thleng tawh tiin a sawi.
Ukraine intelligence hotu Krylo Budanov chuan Pathianni khan video a tihchhuahah beihletna beihpui an thlak chungchang an pholan that duh loh thu sawiin “Ruahmannain ngawih reng a mamawh” tiin a sawi.
Ukraine-in beihletna a neih mek hi hriatfiah a har hle tia sawi a ni a, mahse, US-a inbun thin tank Institute for the Study of War (ISW) te chuan Kyiv forces te chuan front-line li atangin an bei tiin an sawi.
Chutih rual chuan Russian kulh chhutchhiat an tumna lamah Ukrainian sipai te chuan harsatna an tawk nasa tho va, kar kalta Ningani pawh khan Zaporizhzha chhim chhak lam an beihnaah American siam Bradley fighting vehicle an hloh teuh thu an sawi a.
Heng vehicle zinga pakua chu tihchhiata a awm thu sawiin an ruahmannate chu tu emawin a tiputru nia an ngaih thu an sawi bawk a. Analysts te chuan Russia chu a sipaite a thla a thla a chhek muk tawh avangin Ukraine chuan harsatna a tawk lo thei lo an ti bawk.
Mahse hmun dangah chuan Kyiv sipaite chuan hma an sawn nia ngaih niin frontline te su tlangin chunga an hmalaknaah chuan German siam Leopard-2 tank te an hmang tangkai hle tia sawi a ni.
Ukraine indona hian reh lam a pan hmel loh hle a, khawchhak lamah Russia chuan a ram luah chin te humhim tumin nasa zawkin hma a la zel dawna ngaih a ni bawk a. Thla tam a lo awp tawh a nih avangin invenna lam pawh a sawh nghet tawh hle a, hei vang hian Ukraine tan thil a harsa zual tia sawi a ni.