Ukraine-in Olympic qualifiers-ah Russian nena tel dun duh lo

Ukraine-in Olympic qualifiers-ah Russian nena tel dun duh lo
Ukraine cabinet minister Oleh Nemchinov chuan 2024 Paris Olympics-a tel tur zawnna Olympic qualifiers-ah Russian-te nen huang khata an inel dawn a nih chuan Ukrainian infiammite chu an tel ve tur a ni lo tiin thuchhuah a siam.
He thutlukna hi Ukraine youth and sport minister leh Ukraine Olympic committee chairman ni bawk Vadym Guttsait rawtna anga kalpui a ni.
Tunhnaiah International Olympic Co-mmittee (IOC) chuan neutral flag hnuaiah Russian leh Belarusian infiammite chu Olympics-a tel tur zawnna leh 2024 Paris Olympics-ah neutral flag zar chungin tel ve se tiin rawtna a tichhuak a, hei hi Ukrainian-te chuan na taka dodal mekin, Nemchinov a tawng chhuak a, “Sawrkar meeting chuan kan thawhpui Guttsait rawtna angin Russian-te tel ve na tawh phawtah chuan qualifying com-petition eng pawh hmachhawn ve loh kan titlu,” tiin an ngaihdan a sawichhuak.
Ukrainian skeleton racer hriat hlawh, Olympic-a tum hnih inlan tawh Vladyslav Heraskevych thung chuan BBC Sport hnenah Russian infiammite tel ve na a nih dawn phawt chuan Olympics qualifiers mai piahlam intihsiak dang zawng zawngah pawh Ukrai-nian infiammite an inlan loh zel a rin thu a sawi a, chumi chungchangah erawh thu chiang an la hriat bik loh thu leh an sawrkar thutlukna an hriat har deuh thu sawiin, national TV kaltlanga an hriat chauh thu a tarlang a, an sawrkar thutlukna siam chu mi-mala a pawm loh thu leh hremna hmachhawn thei an nih thu a tarlang tel.
Heraskevych-a ngaihdan chuan thutlukna siam tur chu infiammite an nih thu leh sawrkarin infiammite an nawr lui tura a ngaih loh thu a sawilang tel bawk.
February 2022-a Russia-in Belarus thlawpnaa Ukraine a run hnu lawk khan IOC chuan an hnuaia federation tinte chu an competition buatsaih tawh phawta Russia leh an thawhpui Belarus ram atanga infiammi chhuak tur tel phalsak lo turin a hriattir a, kuminah erawh rawtna dang tichhuakin, team hminga chhuah chu la khap zui zel tur ni mah se mimal hminga tel erawh phalsak ni se tiin rawtna thar a siam a, mahse, Paris 2024 Olympics-ah hian Russian leh Bela-rusian infiammite an tel ngei dawn em tih erawh a la chiang lo a, thutlukna mumal tak khawrpum a la ni lo thung.
Ukraine lam erawh an la khawng hle a, Russian leh Belarusian-te inlan khapna hnukdawka an tel ve phalsak a nih dawn chuan Paris Games boycott-ah hial an vau!
Tunkar Thawhlehni daih tawh khan IOC president Thomas Bach chuan international competition-a Russian leh Belarusians athlete-te sengluh tumna chu a taka chantir tum mek a nih thu sawiin, he rawtna hian Ukrainian-te bakah dodaltu dang thahnem tak an awm.
Ram pahnih infiammite hnawl zui zel rih thlawptu ram 36 zingah United Kingdom an tel.
Tokyo khawpuiin 2020 Olympics a thlen tum khan wrestler Zhan Beleniuk chiah Ukrainian zinga gold medal hawn thei awmchhun niin, indonain a tihbuai karah Paris 2024 Olympics hi an hmachhawn thei a nih pawhin Ukraine mite tan beisei a sang rih lo zui zel tura ngaih a ni.
Thla hmasa mai khan outdoor hard court-a hmeichhe professional tennis player-te inelna ATX Open final-ah Ukrainian tennis player Marta Kostyuk chuan Russian Varvara Gracheva hnehin, a WTA title hmasaber a lak hnu inkhelh banah Ukrainian nula hian a tumpui Russian chu a chibai duh lo a, nikum September thla khan Kostyuk hian US Open-a a tumpui Belarusian Victoria Azarenka pawh a lo chibai duh lo tawh bawk.