Ukraine-in ramri inremna siam tum lo

Ukraine President Volodymyr Zelensky chuan Russia nena inremna siam a nih theih nan an ramri chana inremna an siam dawn hauh loh thu a sawi.
BBC tena an interview naah Ukraine-in Russia laka a ram a hloh a nih chuan Russia chu nasa zawkin a huangtau zel ang tia sawiin Western weapons te chuan remna an siam thei a ti bawk a.
Zelensky chuan Russia-in thal thawt veleh beihpui a thlak dawn tia an sawi lawk chu a intan der tawh thu a sawi a. “Hmun hrang hrang atangin Russia in min bei tan mek a ni,” tiin a sawi bawk a.
Mahse, Ukraine sipaite chuan Russia hmatawng te chu an dang thei tia sawiin Russia sipaite nawr let zui zel thei turin Ukraine chuan Khawthlang ram te ralthuam a mamawh tiin a sawi bawk a.
“Modern weapons te hian remna an tichak thei a nia., Ralthuam te hi Russia-in tawng a hriat thiam theih awm chhun a ni” tiin Zelensky chuan a sawi bawk.
Kar kalta khan Zelensky hian UK leh EU leader te chu international support tam zawk a hmuh theih nan a hmu a, an ram venhim nan ralthuam tha tam zawk a dil bawk. Ukraine presdient in UK hnena fighter jet a dilna chu UK Prime Minister Rishi Sunak chuan ‘engmah kan ti lovang tih sawi theih a ni lo’ tiin a sawi.
Kyiv chu tun hnaia Western weapons an tiam tena an ram a luh mai theih loh avangin an dawhthei lo hle tawh a. Thla kaltaa khawthlang ram Germany leh US leh UK tena tank an tiam te pawhin Ukraine ram an la lut thei lo a ni.
Hetih lai hian Belarus leader Alexander Lukashenko, Russia thlawp leh tantuin Ukrainian sipai tena an ramri an luh hlek a nih chuan Russia thlawpin a sipaite a chhawp chhuak nghal ang a tih chu a chhang let bawk a.
“Belarus hian indona a zawm loh ka beisei” tia sawiin Zelensky chuan, “A zawm a nih chuan kan beilet ang a, kan dam khawchhuak em em ang” tia sawiin Russia-in Ukraine beih nana remchanga Belarus a hmang a nih ngat chuan ‘tihsual lian tak a ni ang’ tiin a sawi bawk.
Russia hian thla 12 kaltaa Ukraine a beih khan Belarus chu remchangah a lo hmang tawh a. Chhim lam atangin Ukraine capital Kyiv hnaih tak thlengin an lut hman a, mahse, nawrlet in an awm ta zawk a ni.
Russia-in tun indonaa tactic a hmang chungchang zawhna pawh Zelensky chuan chhangin ‘hlutna nei lo’ tiin a sawi a. “Engkim tihchhiat vek an kalpui a. An sipai tena thupek an kengkawh a nih chuan chutiang rilru pu sa chu an ni tihna a ni bawk,” tiin a sawi.
Tunkara Ukrainian data tihchhuah Ukraine-a Russian sipai te chu hun dang zawng aiin tun thla hian nunna chan an tam zawk tih a ni a. Mi engzah chiahin nge nunna chan a hriat theih loh a, mahse, UK Ministry of Defence chuan Kyiv data chu a rintlak a rinawm thu a sawi.
“Kan inlungrualna hi kan damkhawchhuahna tur a ni” tiin Zelensky chuan a sawi a. “Ukraine hian dam khawchhuah tumin a bei mek a ni,” tia sawiin an ram chu Europe awnin a kal zel dawn tiin a sawi bawk a.
“Kan kawng zawh mek hi kan thlan a ni a. Security guarantee kan duh a, kan ramri kan chan a nih chuan state chak lo zawk kan ni zel ang,” tiin a sawi bawk a.
“|hat tlanna tura inphah hnuaina lam a ni lo. Engmah hlauh kan nei lo va, Ni tinin maktaduai chuangin nun tha duhin ni tin nun kan hmang a ni,” a ti bawk a.
“Putin nena inbiakna neih kan duh lo va, a chhan chu inrintawnna a awm lo,” tiin a sawi bawk.