Ukraine-in US siam cluster bomb a hmang

White House chuan Ukraine-in US siam cluster bomb-te chu Russsian sipaite lakah a hman ngei thu a puang chiang a.
National Security thupuangtu John Kirby chuan heng bomb-te hi Russian inkhuarna tihchhiat nan Ukraine chuan a hmang tangkai hle tiin a sawi.
Cluster bomb te hian bomb tenau thahnem tak neiin civilian te tana hlauhawm tak a nih tel bawk avangin ram 100 chuangin hman an khap mek a ni.
US chuan a hmain Ukrainian ammunition supply tihchak nana pek a lo remti tawh a. Ukraine pawhin he bomb hi chu Russian sipaite awmna bikah liau liau chauh hman a intiam a ni.
“Awmze nei takin an hmang” tia sawiin Kirby chuan, “Awmze nei taka hmangin Russia defence formation a nghawng na hle a ni,” tiin a sawi bawk.
Ukraine-in summer counter-offensive a kalpui hnuah ammunition a tlakchham thu a sawi hnuah a ngenna angin US chuan cluster bomb te hi a pe a ni.
President Joe Biden chuan thutlukna siam chu ‘harsa tak’ tiin a sawi a, an thawhpui UK, Canada, New Zealand leh Spain te chuan cluster bomb Ukraine hnena pek hi an dodal thung.
Ukraine hnenah hian artillery shell ‘dud rate’ 2.35% vel nei thawn a ni a, hei hi bomblet percentage sawina niin heng bomb te hi puak nghal mai lovin kum tam tak chhung puak lova inhupbet thei a ni.
Cluster bomb te hi trench leh kulha awm hmelma te beih nana tha tak a ni a, hmun zau tak tuam thei a ni bawk.
Cluster bomb te hi Russia chuan nikuma Ukraine a bomb atang khan Ukraine hmun hrang hrangah civilian te pawh an chenna hmunah te pawh a hmang a ni.
US-in cluster bomb Ukraine hnena a thawn hi Russian president Vladimir Putin chuan a haw hle a, an ram chuan an hman zui ve tur thuin a chhang let zui bawk a.
Ukraine khawchhak lam enkawltu general Oleksandr Syrkyi chuan heng ralthuamte hi hmelma te na zawka beih nana an mamawh ngawih ngawih tiin a sawi thung a.
Chutih rual chuan cluster bomb hmanin sawiselna a tawh dan pawh an hriat thu sawiin mahse Russia-in hmang lo chu ni se, kan hmang bik nang, tiin a sawi thung.