Miley Cyrus ‘Flowers’ a par thar leh
Miley Cyrus hla hit ‘Flowers’ chu Billboard Global 200 chart-ah a No.1 a, a zawn ni kher lovin he chart-ah hian kar 13 a No.1 tling ta. Hetihrual hian Taylor Swift ‘Cruel Summer’ pawh top 10-ah a invawrh kai ve leh ta bawk.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only stream (subscription leh ad-supported audio leh video music services) leh download sales te chu tehna pawimawh a ni.
Miley Cyrus ‘Flowers’ hian stream maktaduai 49.7 leh sales 9,000 nei lehin, No.3 atangin No.1 a kai thar leh ta a, he hla hi chart-a a No.1 tawh zawng zawng chu kar 13 a tling ta a, Mariah Carey Krismas hla ‘All I Want for Christmas Is You’ nihrualin, he chart-a No.1 ni rei theihah pahnihna a ni ta a (hmeichhe zaithiam bik hlaah chuan No.1 ni rei ber a ni), kar 15 No.1 thei, Harry Styles ‘As It Was’ chiah a pha lo.
‘Flowers’ hi kumin January-a a tihchhuah tawh kha niin, April thla thleng khan a zawn ni kher lovin chart-ah hian kar 12 a No.1 hman a, kar 10 hnuah No.1-ah a kir leh ta a ni.
Yng Lvcas leh Peso Pluma ‘La Bebe’ chu No.2-ah bawk awm lehin, Eslabon Armado leh Peso Pluma ‘Ella Baila Sola’ chu kar ruk a No.1 hnuah No.3-ah a tawlh a, Rema leh Selena Gomez ‘Calm Down’ chu No.4-ah bawk a la awm a, Fifty Fifty ‘Cupid’ chu No.2 atangin No.5-ah a tawlh ve ta bawk.
Taylor Swift ‘Cruel Summer’ chu stream maktaduai 37.5 leh sales 5,000 tlingin No.16 atangin No.8-ah a invawrh. He hla hi 2019-a a album ‘Lover’ ami kha niin, tunah hian a single thar angin a vawrh lar leh mek a, heti hian Taylor Swift hla he chart top 10-a lang thei hla 15 a awm ta a, hmeichhe zaithiam zingah he chart top 10-a lang thei hla ngah ber niin, mipa lamah top 10-a hla 28 nei thei Drake chiah a pha lo.
-- Advertisement --
Billboard Global 200 Top 10:
1 Flowers – Miley Cyrus
2 La Bebe – Yng Lvcas x Peso Pluma
3 Ella Baila Sola – Eslabon Armado X Peso Pluma
4 Calm Down – Rema & Selena Gomez
5 Cupid – Fifty Fifty
6 Where She Goes – Bad Bunny
7 Last Night – Morgan Wallen
8 Cruel Summer – Taylor Swift
9 Un x100to – Grupo Frontera X Bad Bunny
10 Idol – YOASOBI