Ukraine ramri bulah Russian Navy deputy head thah a ni

Ukraine ramri bulah Russian Navy deputy head thah a ni
Russian sipaite chuan an lawng sipai deputy head chu Ukrainian ramri bulah thah a ni tih an sawi.
President Vladimir Putin-a’n March thlaa lawng sipai hotu ber dawttu atana a ruat, Major General Mikhail Gudkov-a hi Ukraine-a Sumy nena inria awm, Kursk region khawthlang lama ‘ral beihnaah’ a thi niin Russia-a defence ministry chuan a sawi a. Ministry hian ‘ral beihna’ an tih hi an sawi chiang lo thung.
Nikum nipui lai khan Ukraine chuan Kursk hi a bei thut a, hmun tin luhchhuah mah se June thla kha chuan Kyiv hian hmun tlem chauh an luah tawh.
Gudkov-a hi Moscow-in Ukraine a rûn tan atanga sipai a chân len ber zinga mi a ni.
Russia-a Far East Primorsky region Governor Oleg Kozhemyako-a chuan he inbeihnaah hian mi dang 10 an thi ve bawk niin a sawi.
Kozhemyako-a hian sipai lal a thih thu hi Telegram-ah puangin Gudkov-a chu sipai rinawm tak angin ‘a hna a thawhna hmunah a thi’ niin a sawi.
Russian leh Ukrainian sipaite nena inzawm Telegram channel-te chuan thihna hi Ukrainian missile-in ramri atanga km 30 vela hla, Korenevo khuaa Russian command post an kahnaa thleng niin an sawi a, finfiahna erawh a awm lo.
Ukraine hian engmah sawi an la nei lo va, Russian ram chhung chin hi chu an kap ngai lem lo hle thung.
Gudkov-a hi a hma chuan Ukraine khawchhak lama ral beihnaa tel nasa tak, Pacific Fleet-a 155th Naval Infantry Brigade commander a ni thin.
Pacific Fleet hmunpui, khawchhak kila Vladivostok khawpui atanga video tihchhuahah chuan kum 2023-a Hero of Russia Gold Star lo danwg tawh, Gudkov-a hriat reng nan mi tam takin pangpar an dah tih a lang a. February thla khan President Putin-a hnen atangin Kremlin-ah chawimawina hi hlan a ni.
Ukraine chuan Gudkov-a thihnaah hian an inhnamhnawih leh hnawih loh an la sawi lo va. Hetih lai hian Ukrainian security services-te hian thuthar lakhawmtute hnenah tun anga mi bik beihna ang hi an lo tih tawh thin thu an sawi a, hengah hian December, 2024-a Gen Igor Kirillov-a thahna pawh kha a tel.
Kumin kum tirah pawh khan General Yaroslav Moskalik-a chu Moscow-ah car bomb hmanga thah a ni a, Kremlin chuan Kyiv tihah a puh a. President thupuangtu, Dmitry Peskov-a chuan Ukraine chu ‘firfiak taka kan ram chhunga chet an la kalpui zel’ tih a sawi a ni.
Kum 2022-a Russia-in Ukraine a rûn atang khan khawi lam ve ve pawhin mi langsar thah tumin an che chhuak nasa hle.
Nikum khan Ukrainian security service (SBU) chuan Russian-ten President Volodymyr Zelensky leh an hotu lian dang thah an tumna an titlawlh tih an lo sawi tawh.
Indona a chhuah tirh khan Ukrainian hruaitu hian Russia ‘bitum number one’ a nih thu a sawi.