Manipur pawl paliin Shah hnenah SoO chhunzawm loh ngen

Manipur pawl paliin Shah hnenah SoO chhunzawm loh ngen
Muanna a awm theih nana an nawrna kal zelah Manipur-a Meitei, Thadou leh Naga aiawh pawl palite chuan Union Home Minister Amit Shah hnenah Kuki hel pawlte nen Suspension of Operation (SoO) Agreements an siam chu chhunzawm tawh lo turin an ngen.
Heng pawlte hian inremna siampui pawlte hi Manipur-a buaina thlentu ber an nih thu leh inremna chu nasa taka palzut an nih thu an sawi a ni.
Ningania joint memorandum an thehluhah Indigenous Peoples’ Forum Manipur, Thadou Inpi Manipur, Meitei Alliance leh Foothills Naga Co-ordinating Committee chuan SoO hmanga hum pawlte hi May 3, 2023-a Churachandpur atanga chi leh chi inkara buaina chhuak bul tumtu ber an ni hlawm tih an tar lang a. Torbung leh Kanvai-a in an hal atangin zau zawkin buaina hi a chhuak ta niin an sawi a ni.
Shah-a hnena thu thlentu pawlte hian SoO kalpui meka tel pawlte hi an state chhunga chengte himna tiderthawngtute an la ni reng tho niin an sawi a. Kuki National Organisation (KNO) leh United People’s Front (UPF) te chuan kum 2005-ah Indian Army nen inkahhai thuthlung an siam a, hei hi sorkar laipui leh Manipur sorkar nen an pathumin an kalpui zui a. Kum tin tihthar leh thin ni mah se inremna hian muanna a thlen lo va, dan anga thil kalpui a awm phah chuang lo niin an sawi a ni.
Memorandum an thehluhah chuan SoO Agreement hian hel pawlte chu tharum thawh leh dan lova chetna – mi thil chhuhsak, mi ruk bo leh vantlang hmuna ralthuam lek chhuah khapsak an ni chungin hengte hi an palzut vek niin an tar lang.
State sorkar pawhin inremnaah hian ziah chian tawk loh a awm avangin an khap hlei thei lo niin an sawi a. A langsar takah chuan inremna ziaha inremna kenkawh dan entu tur, Joint Monitoring Group (JMG) an tih, hel pawl aiawhte pawh telna chuan inremna palzutte chu an en kân thin niin an sawi a ni.
Pawl palite hian Manipur sorkar chuan SoO hi Kuki National Army (KNA) leh Zomi Revolutionary Army (ZRA) nen March, 2023-ah an ziak a, January, 2024-ah an ziak thar leh tih an sawi a. Mipui thlan state sorkar remtihna lo chuan pawh sei ngawt a theih loh niin memorundum-ah hian an ziak a ni.
Manipur-a remna leh muanna, nunphung pangngai a awm leh theih nana union home minister hnena rawtna an thlen zingah SoO agreement kalpui mek tihtawp bakah mipui thlan sorkar dina dan hnuaia sawihova inremna dap te pawh a tel a ni.
Tar lan tawh thin angin Manipur-ah hian May, 2023 atangin chi leh chi inkarah buaina chhuakin mi 260 chuang thi an awm tawh a. Tharum thawhna chu thleng tam lutuk tawh lo mah se a khât tawkin boruak tang tak tak a la thleng reng tho a ni.