Israel-in Gaza-ah mi 69 thah belh leh

Israel-in Gaza-ah mi 69 thah belh leh
Israel chuan Ningani khan Gaza hmun hrang hrangah mi 69 an kap hlum niin chhanchhuah hna thawktuten an sawi a, nasa takin Palestinian ram hi a bomb a ni.
Hamas hnuaia Civil Defence agency chuan Gaza City-a sikul, indona chhuah hnua miin tawm him nana an hman thlawhna atanga kahna mi 15 an thi niin an sawi a. Israeli sipaite erawh chuan Hamas firfiak ‘pawimawh’ an bitum niin an sawi thung.
Civil Defence hian tanpuina dawn tuma intlar mi 38 thah an ni bawk niin an sawi a. Hei pawh hi sipaite chuan ‘dawt’ tiin an sawi tam lutuk niin an sawi.
Inthahna ni tin a thlen mek reng lai hian US President Donald Trump-a chuan Israel leh Hamas hi inkahhai puanga mi hrente chhuah turin na takin a nawr mek.
Trump-a hian Thawhlehni khan Israel-in ‘tulna avangin’ ni 60 chhung inkahhaina tur a pawm tih a lo sawi tawh a; mahse, hei hian chuti mahin inbeihna a la titawp lo.
Hamas hian vantlanga puan lem loh inkahhai puanna tura rawtna awmte an zir chiang mek tih an sawi a, indona tihtawpa Gaza atanga Israeli-te inhnuhdawh vek erawh an duh tih an sawi.
Thawhtannia Washington tlawh tur, Israeli Prime Minister Benjamin Netanyahu-a erawh chuan Palestinian hel pawl hi an ral vek tur a ni tih a la sawi reng.
Ningani khan Israel Defense Forces (IDF) chuan darkar 24 liam ta chhungin an thlawhnaten Gaza-a ‘firfiakte’ hmun 150 vel an an kap tih an sawi a. An beih zingah hian Hamas mi, an leu verh leh ralthuamte a tel.
Gaza-a Hamas hnuaia health ministry pawhin hetih chhung hian mi 118 an thi niin a sawi ve bawk.
Gaza City-a al-Rimal venga Ningani khaw var hma hreta sikul an kahnaah hian thi zinga eng emaw zat chu hmeichhia leh naupang an ni tih Civil Defence agency leh damdawi inin a sawi.
Chhim lama al-Mawasi-a puan in kaih an kahnaah baihvaia awm mek mi panga vel an thi bawk a, heng mite hi IDF-in a hmaa insaseng tura a tihte niin an inbenbel tharna hmunah kah an ni.
Civil Defence thupuangtu, Mahmoud Bassal-a chuan tanpuina dawn tuma intlar mi 38 chu Israeli sipaiten an kap hlum bawk niin AFP news agency a hrilh.
Mi 25 chu Gaza lailia Israeli sipaite Netzarim corridor bula thah an ni a. Paruk chu a bul lawka thah niin mi dang pasarih erawh chhim lama Rafah-ah an thah niin a sawi.
Chhim lama Khan Younis-a Nasser hospital chuan hmun dangah tanpuina semna hmun pana kal mi 20 vel kah hlum an ni bawk niin Reuters an hrilh bawk.
Heng inthahna thlengah hian IDF chuan engmah sawi an la nei lo.
Tar lan tawh thin angin Israeli sipaite hian October 7, 2023-a Hamas-in an ram beia mi 1,200 chuang an thah leh hren tura mi 251 an hruai phuba lak nan an bei let a. Tun thlengin Gaza-a Hamas hel an rûnnaah hian mi 57,130 an thi tawh niin Gaza health ministry chuan a sawi.