Union HM-in Zokhawsanga
AR insawn tur thu sawi
Union Home minister Amit Shah chuan amah kawmtu Mizoram MP C Lalrosanga hnenah Aizawl laili atangin Zokhawsangah Assam Rifles insawn vek tur thu a hrilh.
Nilaini khan Lok Sabha MP C Lalrosanga hian Union Home minister Amit Shah hi New Delhi-a a pisa ah hmu in, Aizawl atanga Zokhawsanga Assam Rifles an insawnfel vek tur thu hi a lo hrilh.
MP hian Assam Rifles an insawnchhuah dawn avanga lawmthu hrilhin, hemi chungchangah hian amah (Amit Shah) leh sawrkar laipui hotu dangte pawh vawi engmawzat a lo nawr tawh thute a sawi a. Sawrkar laipui laka an thil ngiat tihhlawhtlin a nih dawn takah hian chief minister Pu Zoramthanga pawh a lawm hle tih Union Home minister hi a hrilh.
Assam Rifles hi hun bituk chhunga insawnfel vek tura an duh thu a sawi chu hian an insawn ngei dawn tiin Union Home minister hian a chhang a ni.
Project engemawzat hawng tura Aizawl a tlawh tur thu sawiin, Assam Rifles battalion headquarters a hawn bakah Laldenga Cultural Centre lungphum a phum tur thu a sawi bawk.
Hemi hma hian MP C Lalrosanga hi India President Droupadi Murmu-i’n MP-te tana Rashtrapati Bhavan-a tukthuan a buatsaihah a tel a. Hetah hian Prime minister Narendra Modi bakah central minister-te leh Parliament in hniha member-te an tel.
-- Advertisement --
April 1-a Union Home minister-in Mizorama hawn/ lungphum a phum tura sawi cheng vaibelchhe 2414 man zinga tel thenkhat:
# Zokhawsanga Assam Rifles Bn Hqrs – Vbch 163
# Integrated Command & Control Centre – Vbch 119.2
# Zorinpui- Longmasu NH-502A – Vbch 781.85
# Aizawl Bypass (Package-1) NH-6 – Vbch 329.70
# Aizawl Bypass (Package-3) NH-6 – Vbch 720.72
# Laldenga Cultural Centre – Vbch 193
# Lianchhiari Run – Vbch 10
# Keilungliah Champhai cheina – Vbch 19.88