Union minister hnenah NHIDCL siam lungrem chim nasat thu thlen

Chief minister Lalduhoma chuan Mizorama NHIDCL hnuaia siam retaining wall chim nasa lutuk tih Minister of Road Transport & Highways Nitin Gadkari hnenah a thlen a, enfiah a lo tiam.
Thawhtanni tlai khan PWD minister Vanlalhlana nen Union minister hi a chenna inah an hmu a. Nitin Gadkari hian a ministry hnuaia official pawimawh kokhawmin, Mizorama project hrang hrang leh harsatna awm mekte an sawi ho. Forest clearance chu an mutan ber a ni a, Mizorama hna an thawh mai theih loh thin chhan lian ber chu forest clearance fel lo a ni, tiin a lo hrilh.
Chief minister hian NHIDCL siam retaining wall chim nasa lutuk chu a thlalak nen Nitin Gadkari hi a hmuh tir a. Enfiah nghal a lo tiam a ni. Aizawl Bypass tunnel approach road siamna tur Mizoram sawrkarin a thlen leh Lawngtlai – Siaha inkar Chhimtuipui lui (Tuipui Ferry) a lei dawhna tur detailed project report Mizoram sawrkarin a thehluh tawh pawh a rang thei ang bera tihhlawhtlin dan a zawn tur thu a lo hrilh a ni.
Chief minister leh PWD minister hian Thawhtanni zan khan Union Health minister JP Nadda pawh a chenna inah hmu in an inkawm a. Zoram Medical College tihchangtlunna tur suma tanpuina, Delhi a zin hmasak tuma chief minister-in a lo sawipui tawh chu an sawichhuak leh. Union minister hian tihfel thuai a lo tiam a; ZMC-a Critical Care Block din pawh sawidunin, Union minister hian an lo zirchian tur thu leh chanchin a hriattir leh thuai tur thu a lo hrilh. Health sector-a Mizoram hmasawnna thil an sawidun bawk.