Union MoS-in district hotute kawm

Mizoram tlawha lo zin Union minister of state for Home Affairs Bandi Sanjay Kumar chuan Aizawl atangin inbiak hmuh theihna kaltlangin Thawhlehni khan Siaha district-a sawrkar department hotute a kawm a. Siaha district bawrhsap VL Hruaizela Khiangte hoin head of office leh Mara Autonomous District Council official-ten an chhim.
Union minister of state hi Thawhlehni hian Siaha tlawh tura duanlawk ni mah se, khua in a zir loh avangin ruahmanna tih danglam a ni.
Department hotuten an district chhunga hmalakna hrang hrang an sawizau a. An hnathawh meka harsatna an tawhte an thlen nghal. Cross border chungchang bakah thenawm ramte nena insumdawn tawn chungchang, ruihtheihthil leh puakthei thil lakluh chungchang bakah zirna leh hriselna lama district dinhmun leh chawikan zel dan tur sawiho a ni.