Union MoS-in home a tlawh

Union MoS-in home a tlawh
Union minister of state for Women & Child Development Savitri Thakur chuan zan hnih riah tumin Mizoram a rawn tlawh a, Nilainia Aizawl a thlen hnu ah sawrkar enkawl home thenkhat a tlawh.
Mizoram Women & Child Development department hnuaia hmalakna, Durtlanga hmun nei – hmeichhe dinhmun tleu leh harsatna tawk mekte awmna atana din ‘Shakti Sadan’, naupang thubuai tenau nei mekte dahna hmun ‘Observation Home’, naupang dan bawhchhetuten nun kawng dik an zawh leh theihna tura a bik taka din ‘Special Home’ bakah naupang kum 16 chunglam, pawikhawhna lianthama inhnamhnawih dahna hmun ‘Place of Safety’ a tlawh a ni.
Union MoS hi W&CD minister Lalrinpuii leh department hotu dangten Lengpui Airport atangin an lo dawngsawng a, home a tlawhnaa an zui bakah a ho hian department hnathawh an thlirlet.
Ruahman lawk ang chuan, vawiin – Ningani hian Khawzawl leh Champhaia sawrkar hmalakna a tlawh leh dawn a; Zirtawpni ah chief minister Lalduhoma nen an inkawm hnu ah Delhi a pan dawn a ni.