Union MoS kal tumna MNF-in
an titlawlh – MBJP president
Tunhnaia Mizoram rawn tlawhtu Union minister of state for DoNER BL Verma chuan Silsuri-a Chakmaten an kut an hmannaa khuallian tura an sawmna chu MNF-in an tih tlawlh sak niin BJP Mizoram president Vanlalhmuaka chuan a sawi.
BJP Mizoram-in an State office-a political session an neihah thu sawiin Vanlalhmuaka chuan Chakmate ni pawimawh Biju Festival denchhenin Young Chakma Association chuan Union MoS for DoNER hi khuallian atana sawm an duh angin an biaksak a, helicopter-a kal tura ruahmanna chu MNF lamin thulhtir an tum avangin Silsuri MNF VC-te nen tan an la ta niin a sawi.
“DoNER minister hi kal ta se Khawthlangtuipui paltlang khuaten an hman tangkai tur marboat pek te, inkalpawhna kawng siamthatna tur bakah khawthlang tana hmasawnna thlen theihna’n hmachhawp tha tak, Mizoram sawrkar tih theih loh leh tih duh ngai loh tihsak an tum chu tih theih a ni ta lo a. DoNER minister pawhin a zin programme siam danglamin Mamit leh Aizawl a tlawh phah a ni,” a ti.
DoNER minister hian Silsuri a tlawh tak loh avanga pawi a ti a, kumin MLA inthlanah a tlawh loh chhana mawhphurtute chu na taka chhanlet a tum a, inthlanah a tih tur chu a tih ngei tur thu a sawi niin BJP Mizoram president hian a sawi bawk.
PMAY first instalment chauh dawngte chu BJP chuan an dawn kim theihna’n hma an la mek tih sawiin, “Mirethei in sakna tur hman khawloh a awm leh thil fello a awm a nih pawhin BJP chuan kan enzuiin, chhuichhuah kan tum mek a. PMAY scheme kaltlanga sawrkar laipuiin in neilo te in sakna tur a pek tichingpentuten kan lo tuar palh a nih pawhin an mawh a ni ang,” a ti.
Chi leh sakhua tih bik neilo an nih avangin Mizoramin development a neih theihna atana hmalak chu an hna tul ber a ni tih BJP Mizoram hruaitu hian a sawi a ni.
Union MoS kal tumna MNF-in an titlawlh – MBJP president
Get real time updates directly on you device, subscribe now.