United an chak leh ta

Michael Carrick hnuaiah Manchester United Puja a fuh chhunzawm zel a, Pathianni zan khan Old Trafford-a an mikhual Fulham an hneh a, a zawnin vawi thum an chak ta chiah. Palinaa awm mek United hian table-ah dinhmun sang zawk luah tumin tan an khawh zui dawn a, nupui nei thar ang maiin a phur surh mai a, dan an har rih viau.
Michael Carrick hnuaia siam tharna chang United hian Old Trafford-ah Fulham an mikhual. An mualah bul tan tha viau mah se an chak zo lo teuh hle a. Hun tawp dawna Benjamin Sesko goal thun hmangin hnehna an chang hram a, hun rei tak an tawn ngai tawh loh hun tawngin vawi thum an chak zawn. Vawi thum chak zawn hi United tantute tan mas ang maia nuam leh thlakhlelhawm a ni.
United hian an mualah bul an tan tha a, inkhel tan tirh lamah penalty an hlawhchhuak hman thuak. VAR rawn a nih hnuah penalty hnawl ni mah se free-kick erawh an hlawhchhuak tho thung. Bruno Fernandes free kick chhuih tha tak che Casemiro chuan minute 19-naah chiang zetin a tauh goal a, hmahruaina goal a thun. Goal chhuah hmasa mah se Fulham in United hi an tiatpui chet tlat a, an hlau bik lo hle. Goal thun tumin an innawr tawn nasa viau a, inkhel hmuhnawm an lantir. Innawr tawn viau mah se chawlhlawk hmain goal thun belh thei an awm lo thung.
Chawlhlawk hnu lamah United an khel tha chhunzawm a, Matheus Cunha chuan minute 56-naah tha zetin a pet goal a, United in an hmahruaina an tizau. Si hniha hma an hruai vangin chak turin United dinhmun a tha tawh hle.
Goal hnih chhuah zawnin, dinhmun chhe takah ding mah se Fulham an zam chuang eih lo. An goal thun hmasak hnawl ni bawk mah se penalty an hlawhchhuak ta nge nge. Penalty hi Raúl Jiménez chuan inrintawk zetin minute 85-naah a pet goal a, goal a thun ta nge nge. Raul goal hian a fuih phur viau a, United an nawr nasa hle. Hun pangngai tawp hnu minute 90+1-ah Kevin chuan pui zetin top corner-ah a pet goal a, an si phurh an sut zo ta nge nge.
2-2 a nih atanga second 18-na lekah United in fuh zetin an mikhualte an nawr tlang a, bench atanga lut Benjamin Sesko chuan fuh zetin a pet goal a, hma an hruai let lehna goal a thun. Sesko goal thun hi Fulham in an sut thei tawh lova, United chuan Michael Carrick hnuaiah a zawna a vawi thum nan hnehna changin point thum hlu tak an hmu.
Fulham hnehtu United hi Chelse lehpelin palinaah an kir leh a. Fulham hian pariatna an luahve thung.